មនុស្សជាង ២០០,០០០ នាក់ប្រមូលផ្តុំគ្នាក្នុងទីក្រុង Amsterdam ទាមទារឱ្យមានវិធានការតឹងរ៉ឹងប្រឆាំងនឹងអ៊ីស្រាអែល

ក្រុមបាតុករជាង ២០០,០០០ នាក់ បានប្រមូលផ្តុំគ្នានៅតាមដងផ្លូវនានាក្នុងទីក្រុង Amsterdam របស់ប្រទេសហូឡង់ កាលពីថ្ងៃអាទិត្យ ទី៨ ខែវិច្ឆិកាម្សិលមិញ ដើម្បីទាមទារឱ្យរដ្ឋាភិបាលចាត់វិធានការជាក់ស្តែង និងម៉ឺងម៉ាត់ប្រឆាំងនឹងសង្គ្រាមប្រល័យពូជសាសន៍របស់អ៊ីស្រាអែលមកលើតំបន់ហ្គាហ្សា។ អ្នកចូលរួមក្នុងបាតុកម្មដែលមានឈ្មោះ «បន្ទាត់ក្រហម» ឬ Red Line នេះ បានទាមទារឱ្យមានការដាក់ទណ្ឌកម្មលើវិស័យពាណិជ្ជកម្មយ៉ាងតឹងរ៉ឹងបំផុតលើអ៊ីស្រាអែល និងបញ្ឈប់រាល់ការលក់អាវុធគ្រប់ប្រភេទ។ គិតរហូតមកទល់ពេលនេះ ចំនួនជនជាតិប៉ាឡេស្ទីនដែលស្លាប់ដោយការវាយប្រហាររបស់យោធាអ៊ីស្រាអែលនៅតំបន់ហ្គាហ្សា បានកើនឡើងដល់ប្រមាណ ៧៤,០០០ នាក់ហើយ ចាប់តាំងពីសង្គ្រាមផ្ទុះឡើងកាលពីខែតុលា ឆ្នាំ ២០២៣ ដែលក្នុងនោះប្រមាណ ២១,០០០ នាក់ជាកុមារ។ ទោះបីជាបទឈប់បាញ់នៅក្នុងតំបន់ហ្គាហ្សាត្រូវបានប្រកាសជាផ្លូវការតាំងពីថ្ងៃទី ១០ ខែតុលា ឆ្នាំមុនក៏ដោយ ប៉ុន្តែការវាយប្រហារតាមអាកាស និងការបាញ់ផ្លោងរបស់កងទ័ពអ៊ីស្រាអែល នៅតែបន្តផ្តាច់ជីវិតប្រជាជនប៉ាឡេស្ទីន ស្ទើរតែរាល់ថ្ងៃរហូតមកដល់ពេលបច្ចុប្បន្ន។ វិបត្តិដ៏ក្តៅគគុកនេះ ក៏បានបង្កផលប៉ះពាល់យ៉ាងខ្លាំងដល់ទំនាក់ទំនងការទូតរវាងប្រទេសហូឡង់ និងអ៊ីស្រាអែល ដោយរដ្ឋមន្ត្រីការបរទេសហូឡង់ បានបង្ខំចិត្តលាលែងពីតំណែងកាលពីឆ្នាំមុន បន្ទាប់ពីរូបលោកមិនអាចជំរុញឱ្យមានការអនុម័តទណ្ឌកម្មថ្មីៗប្រឆាំងនឹងអ៊ីស្រាអែល៕ អត្ថបទ៖ រិទ្ធី