ក្រុមឆបោកក្លែងជាមន្ត្រីយោធា ស្នេហា និងការវិនិយោគ នៅប៉ាតាយ៉ាត្រូវបង្ក្រាប ពាក់ព័ន្ធទឹកប្រាក់រហូតដល់៣៥០លានបាត

កាលពីរសៀលថ្ងៃទី៩ ខែវិច្ឆិកា នគរបាលថៃបានឆ្មក់ចូលវីឡាប្រណីតមួយក្នុងស្រុកបាងឡាម៉ុង តំបន់ប៉ាតាយ៉ា ខេត្តឈុនបុរី ដោយបង្ក្រាបក្រុមឆបោកតាមអ៊ីនធឺណិតឆ្លងដែនមួយ ដែលភាគច្រើនជាជនជាតិចិន។ នៅទីតាំងនោះ នគរបាលបានចាប់ខ្លួនមនុស្ស១០នាក់ រួមមានជនជាតិចិន៨នាក់ និងជនជាតិមីយ៉ាន់ម៉ា២នាក់។ តាមការស៊ើបអង្កេតរបស់នគរបាល ក្រុមនេះផ្តោតគោលដៅលើស្ត្រីចិន ដោយប្រើល្បិចបោកស្នេហាឱ្យវិនិយោគ។ សមាជិកក្រុមក្លែងខ្លួនជាមន្ត្រីយោធាជាន់ខ្ពស់ចិន ហើយស្វែងរកស្ត្រីមេម៉ាយ ឬរស់នៅម្នាក់ឯងតាមកម្មវិធី Douyin។ ពួកគេចំណាយពេលពី១៥ទៅ៣០ថ្ងៃដើម្បីបង្កើតទំនាក់ទំនងស្នេហា រួចបញ្ចុះបញ្ចូលជនរងគ្រោះឱ្យទាញយកកម្មវិធីវិនិយោគក្លែងក្លាយ និងផ្ទេរប្រាក់ទៅគណនីដែលបានកំណត់។ ទិន្នន័យដែលនគរបាលមានបង្ហាញថា មានប្រតិបត្តិការផ្ទេរប្រាក់ច្រើនជាង៧០០លើក ពាក់ព័ន្ធទឹកប្រាក់ប្រមាណ៣០០ទៅ៣៥០លានបាត និងមានស្ត្រីចិនរងគ្រោះប្រហែល១០០នាក់។ យោងតាមការស៊ើបអង្កេត ទីតាំងឆបោកនេះបានដំណើរការប្រហែល៦ខែ ដោយជួលវីឡាដែលមានអាងហែលទឹក ក្នុងតម្លៃប្រមាណ១៤ម៉ឺនបាតក្នុងមួយខែ។ នគរបាលបានចង្អុលបង្ហាញថា បុរសជនជាតិចិនឈ្មោះ Guan Chunyu អាយុ៣៧ឆ្នាំ ជាមេក្រុមដែលត្រូវបានចោទសង្ស័យ ប៉ុន្តែបុរសរូបនេះមិនស្ថិតក្នុងបញ្ជីអ្នកដែលត្រូវបានចាប់ខ្លួនក្នុងប្រតិបត្តិការនេះទេ។ ជនជាតិចិនទាំង៨នាក់ដែលត្រូវបានចាប់ខ្លួន សុទ្ធតែជាប់សង្ស័យថាបានចូលប្រទេសដោយខុសច្បាប់ ហើយ៤នាក់ក្នុងចំណោមពួកគេត្រូវបានអាជ្ញាធរចិនតាមចាប់ខ្លួនរួចហើយ។ ជនជាតិមីយ៉ាន់ម៉ា២នាក់មានតួនាទីសម្អាតវីឡា។ នគរបាលបានរឹបអូសកុំព្យូទ័រ ទូរស័ព្ទ និងស៊ីមកាតយ៉ាងហោចណាស់១៧៨សន្លឹក ហើយកំពុងបន្តតាមដានលំហូរប្រាក់ឆបោក និងមនុស្សពាក់ព័ន្ធផ្សេងទៀត។