ទូរទស្សន៍ខេត្តព្រះសីហនុ ថ្ងៃទី៦ ខែសីហា៖ ក្រសួងការពារជាតិកម្ពុជាបានឱ្យដឹងនៅថ្ងៃទី៦ ខែសីហាថា ស្ថានការណ៍នៅតំបន់អានសេះ ខេត្តព្រះវិហារ នៅតែស្ងប់ស្ងាត់។ ភាគីកម្ពុជាបញ្ជាក់ថា តំបន់នេះនៅតែស្ថិតក្រោមការគ្រប់គ្រងរបស់កងទ័ពកម្ពុជា។
លោកស្រី ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានឱ្យដឹងថា កងទ័ពថៃបានរាយបន្លាលួសនៅតំបន់អានសេះកាលពីថ្ងៃទី៤ ខែសីហា និងបានប្រើគ្រឿងចក្រដើម្បីធ្វើការសាងសង់។ ភាគីកម្ពុជាបានចាត់ទុកទង្វើនេះថា ជាការរំលោភលើកិច្ចព្រមព្រៀងឈប់បាញ់ដែលសម្រេចបានកាលពីថ្ងៃទី២៨ ខែកក្កដា។
យោងតាមសេចក្ដីជូនដំណឹងរបស់ក្រសួងការពារជាតិកម្ពុជា កងទ័ពកម្ពុជា និងថៃដែលឈរជើងនៅតំបន់នោះបានជួបចរចាគ្នានៅរសៀលថ្ងៃទី៥ ខែសីហា។ គិតត្រឹមម៉ោង៥ និង៣០នាទីល្ងាចថ្ងៃដដែល បន្លាលួសត្រូវបានរុះរើ ហើយគ្រឿងចក្ររបស់ភាគីថៃបានផ្អាកដំណើរការ។
ក្រសួងការពារជាតិបានបញ្ជាក់ថា តំបន់អានសេះជាផ្នែកមួយដែលមិនអាចកាត់ផ្ដាច់បាននៃដែនអធិបតេយ្យរបស់កម្ពុជា។ ក្រសួងបានឱ្យដឹងថា រាជរដ្ឋាភិបាលនៅតែប្ដេជ្ញាដោះស្រាយជម្លោះព្រំដែនដោយសន្តិវិធី ព្រមទាំងការពារអធិបតេយ្យជាតិ និងបូរណភាពទឹកដីយ៉ាងមុតមាំ ហើយមិនអត់ឱនចំពោះអំពើឈ្លានពាន ឬបង្កហេតុក្នុងទម្រង់ណាមួយឡើយ។
រៀបរៀងដោយទូរទស្សន៍ខេត្តព្រះសីហនុ
..
