ក្រសួងទេសចរណ៍បានណែនាំអំពីការត្រៀមចេញផ្សាយ «ទស្សនាវដ្តីទេសចរណ៍ជាតិកម្ពុជា» ដែលជាទស្សនាវដ្តីទេសចរណ៍ជាតិដំបូងបង្អស់ និងជាសមិទ្ធផលថ្មីក្នុងវិស័យទេសចរណ៍កម្ពុជា។ នេះបើយោងតាមការចេញផ្សាយដោយក្រសួងទេសចរណ៍កម្ពុជានៅថ្ងៃទី១០ខែវិច្ឆិកាឆ្នាំ២០២៦នេះ។
ក្រសួងទេសចរណ៍បានឲ្យដឹងថាទស្សនាវដ្តីនេះត្រូវបានបង្កើតឡើងជាវេទិកាផ្លូវការសម្រាប់បង្ហាញពីភាពសម្បូរបែបនៃគោលដៅទេសចរណ៍កម្ពុជា តាមរយៈអត្ថបទបែបនិទានរឿង រូបភាពធម្មជាតិ និងការរចនាប្រកបដោយវិជ្ជាជីវៈ ស្របតាមស្តង់ដាអន្តរជាតិ ដោយរក្សាអត្តសញ្ញាណជាតិ។ គោលដៅសំខាន់គឺជំរុញកម្ពុជាឱ្យក្លាយជាគោលដៅទេសចរណ៍ឈានមុខគេក្នុងតំបន់ និងលើកកម្ពស់ការទទួលស្គាល់ពីសំណាក់ភ្ញៀវទេសចរអន្តរជាតិ។
តាមរយៈទស្សនាវដ្តីនេះ កម្ពុជានឹងត្រូវបានបង្ហាញក្នុងទិដ្ឋភាពកាន់តែទូលំទូលាយ មិនត្រឹមតែតំបន់អង្គរប៉ុណ្ណោះទេ ប៉ុន្តែថែមទាំងរួមបញ្ចូលតំបន់ទេសចរណ៍ធម្មជាតិ មរតកវប្បធម៌ ប្រពៃណី ម្ហូបអាហារ និងជីវភាពរស់នៅរបស់សហគមន៍មូលដ្ឋាន។ ជាពិសេស ការនិទានរឿងតាមបទពិសោធន៍ជាក់ស្តែង នឹងជួយបង្ហាញពីភាពទាក់ទាញនៃកម្ពុជា និងផ្សព្វផ្សាយអត្តសញ្ញាណជាតិ «ស្នាមញញឹមរបស់កម្ពុជា» ទៅកាន់ពិភពលោក ព្រមទាំងលើកស្ទួយទេសចរណ៍បៃតង ការអភិវឌ្ឍប្រកបដោយចីរភាព និងបរិយាបន្ន។
លើសពីការផ្សព្វផ្សាយព័ត៌មាន ទស្សនាវដ្តីទេសចរណ៍ជាតិកម្ពុជាក៏មានតួនាទីជាអ្នកតំណាងផ្នែកទេសចរណ៍ក្នុងការទាក់ទាញភ្ញៀវអន្តរជាតិឱ្យមកស្វែងយល់ពីកម្ពុជាកាន់តែស៊ីជម្រៅ តាមរយៈការបង្ហាញបទពិសោធន៍ធ្វើដំណើរប្រកបដោយសុវត្ថិភាព ការទទួលស្វាគមន៍យ៉ាងកក់ក្តៅ និងការលើកទឹកចិត្តឱ្យភ្ញៀវស្នាក់នៅបានយូរជាដើម៕ ដោយ៖ សុភ័ក្រ្ត
