អ្នកនាំពាក្យរាជរដ្ឋាភិបាលអំពាវនាវឱ្យជឿទុកចិត្តលើថ្នាក់ដឹកនាំក្នុងការដោះស្រាយជម្លោះព្រំដែន

ស្ថានីយទូរទស្សន៍ខេត្តព្រះសីហនុ ថ្ងៃទី១៥ ខែសីហា។ ក្នុងសន្និសីទសារព័ត៌មានថ្ងៃនេះ អ្នកនាំពាក្យរាជរដ្ឋាភិបាលកម្ពុជា ប៉ែន បូណា បានថ្លែងថា ប្រជាពលរដ្ឋកម្ពុជាមានទំនុកចិត្តលើថ្នាក់ដឹកនាំ។ លោកថា សម្តេច ហ៊ុន សែន និងនាយករដ្ឋមន្ត្រី ហ៊ុន ម៉ាណែត មានបទពិសោធន៍ក្នុងការដឹកនាំប្រទេស និងដោះស្រាយវិបត្តិ ដែលអាចជួយដោះស្រាយជម្លោះព្រំដែនជាមួយថៃ។

លោក ប៉ែន បូណា ថ្លែងថា ថ្នាក់ដឹកនាំទាំងពីរធ្លាប់ឆ្លងកាត់សង្គ្រាម និងយល់ច្បាស់ពីការបំផ្លិចបំផ្លាញរបស់វា។ លោកបញ្ជាក់ថា ថ្នាក់ដឹកនាំគ្រប់កម្រិត មន្ត្រីស៊ីវិល និងកងកម្លាំងប្រដាប់អាវុធ កំពុងរួមគ្នាដោះស្រាយបញ្ហាប្រឈមរបស់ប្រទេស។

លោកបានអំពាវនាវឱ្យពលរដ្ឋជឿទុកចិត្តលើការដឹកនាំរបស់រាជរដ្ឋាភិបាល ដើម្បីនាំកម្ពុជាឆ្ពោះទៅរកសន្តិភាព ស្ថិរភាព និងវិបុលភាព។

រៀបរៀងដោយស្ថានីយទូរទស្សន៍ខេត្តព្រះសីហនុ។