ស្ថានីយទូរទស្សន៍ខេត្តព្រះសីហនុ ថ្ងៃទី១៥ ខែសីហា។ កាលពីរសៀលម្សិលមិញ រដ្ឋមន្ត្រីទេសចរណ៍ ហួត ហាក់ បានទទួលជួបលោកស្រី Zhang Jing ប្រធានប៉ុស្តិ៍អន្តរជាតិឡានឆាង–មេគង្គ នៃស្ថានីយវិទ្យុ និងទូរទស្សន៍យូណាន និងក្រុមការងារ។ លោកបានស្វាគមន៍របាយការណ៍ និងអនុសាសន៍របស់ពួកគេ។ ភាគីទាំងពីរបានពិភាក្សាការត្រៀមរៀបចំព្រឹត្តិការណ៍ទេសចរណ៍អន្តរជាតិធំៗនៅរាជធានីភ្នំពេញ និងខេត្តសៀមរាប ក្នុងឆ្នាំទេសចរណ៍កម្ពុជា–ចិន។
នៅក្នុងជំនួបស្តីពីការផ្សព្វផ្សាយទេសចរណ៍កម្ពុជាទៅទីផ្សារចិន លោករដ្ឋមន្ត្រីបានថ្លែងអំណរគុណ និងកោតសរសើរលោកស្រី Zhang Jing ដែលបានប្រើវីដេអូផ្សព្វផ្សាយគោលដៅទេសចរណ៍ ទេសភាពស្រស់ស្អាត វប្បធម៌ដ៏សម្បូរបែបនិងចំណាស់ និងភាពរាក់ទាក់របស់ប្រជាជនកម្ពុជា ដើម្បីទាក់ទាញភ្ញៀវទេសចរចិនកាន់តែច្រើន។
លោករដ្ឋមន្ត្រីក៏បានគាំទ្រការអញ្ជើញអ្នកសារព័ត៌មានល្បីៗ និងអ្នកផលិតមាតិកាតាមអ៊ីនធឺណិតពីចិនមកកម្ពុជា ដើម្បីស្វែងយល់ផ្ទាល់ពីស្ថានភាពនយោបាយ សង្គម និងសន្តិសុខ និងពីការរៀបចំបរិយាកាសសុវត្ថិភាពនិងផាសុកភាពសម្រាប់ភ្ញៀវ។ លោកថា ការធ្វើដូច្នេះនឹងជួយផ្សព្វផ្សាយកម្ពុជាជាគោលដៅដែលមានសុវត្ថិភាព និងស្វាគមន៍ភ្ញៀវ។
រៀបរៀងដោយស្ថានីយទូរទស្សន៍ខេត្តព្រះសីហនុ។
