តាមគម្រោងដែលបានផ្សព្វផ្សាយនៅពេលនោះ ព្រះមហាក្សត្រ នរោត្តម សីហមុនី និងសម្ដេចព្រះវររាជមាតា នរោត្តម មុនីនាថ សីហនុ គ្រោងយាងទៅបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋប្រជាមានិតចិន នៅដើមខែកញ្ញា។ ព្រះរាជដំណើរនេះមានគោលបំណងចូលរួមពិធីរំលឹកខួបលើកទី៨០ នៃជ័យជំនះក្នុងសង្គ្រាមតស៊ូរបស់ប្រជាជនចិនប្រឆាំងនឹងការឈ្លានពានរបស់ជប៉ុន និងសង្គ្រាមប្រឆាំងហ្វាស៊ីសពិភពលោក នៅថ្ងៃទី៣ ខែកញ្ញា នៅទីក្រុងប៉េកាំង។
ដំណឹងនេះត្រូវបានបញ្ជាក់ក្នុងជំនួបទ្វេភាគីរវាងឧបនាយករដ្ឋមន្ត្រី និងរដ្ឋមន្ត្រីការបរទេសនិងសហប្រតិបត្តិការអន្តរជាតិកម្ពុជា ប្រាក់ សុខុន និងរដ្ឋមន្ត្រីការបរទេសចិន វ៉ាង យី នៅក្រៅកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង នៅក្រុងអាននីង ខេត្តយូណាន កាលពីសប្ដាហ៍មុន។
រដ្ឋមន្ត្រីការបរទេសទាំងពីរក៏បានឱ្យដឹងថា នាយករដ្ឋមន្ត្រី ហ៊ុន ម៉ាណែត គ្រោងទៅប្រទេសចិននៅដើមខែកញ្ញា ដើម្បីចូលរួមកិច្ចប្រជុំកំពូល SCO Plus។
រដ្ឋមន្ត្រីទាំងពីរបានបញ្ជាក់ជាថ្មីពីការប្ដេជ្ញាពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ និងមិត្តភាពដែកថែប ព្រមទាំងជំរុញក្របខណ្ឌកិច្ចសហប្រតិបត្តិការត្បូងពេជ្រ និងគម្រោងច្រករបៀងត្រីនិងអង្ករ និងច្រករបៀងឧស្សាហកម្មនិងនវានុវត្តន៍ ដើម្បីជាប្រយោជន៍ដល់ប្រទេស និងប្រជាជនទាំងពីរ។
លោក វ៉ាង យី និងលោក ប្រាក់ សុខុន បានសាទរការលើកកម្ពស់ទំនាក់ទំនងកម្ពុជា-ចិន។ ភាគីទាំងពីរកំពុងកសាងសហគមន៍កម្ពុជា-ចិនដែលមានអនាគតរួមក្នុងយុគសម័យថ្មី តាមការឯកភាពក្នុងអំឡុងទស្សនកិច្ចផ្លូវរដ្ឋរបស់ប្រធានាធិបតីចិន ស៊ី ជិនពីង មកកម្ពុជា កាលពីខែមេសា ដែលជាជំហានថ្មីក្នុងទំនាក់ទំនងទ្វេភាគី។
សេចក្ដីរាយការណ៍រួមរបស់ស្ថានីយទូរទស្សន៍
