ស្ថានីយទូរទស្សន៍ខេត្តព្រះសីហនុ រាយការណ៍ថ្ងៃទី១៩ ខែសីហា៖ កាលពីម្សិលមិញ លោកជំទាវ ចម និម្មល រដ្ឋមន្ត្រីពាណិជ្ជកម្មកម្ពុជា បានទទួលគណៈប្រតិភូសហគ្រាសកែច្នៃបន្លែនិងផ្លែឈើក្នុងស្រុក នៅទីស្ដីការក្រសួងពាណិជ្ជកម្ម ដើម្បីសម្ដែងការគួរសម និងពិភាក្សាការងារ។
ភាគីទាំងពីរបានពិភាក្សាពីវឌ្ឍនភាពនៃការកែច្នៃនិងការនាំចេញកសិផលកម្ពុជា។ តំណាងក្រុមហ៊ុនបានស្នើឱ្យក្រសួងជួយបន្ថែមលើការពង្រីករោងចក្រ និងការរៀបចំអនុស្សរណៈស្ដីពីការទិញលក់ដំណាប់ស្វាយសម្រាប់ទីផ្សារចិន សហរដ្ឋអាមេរិក និងអឺរ៉ុប។
លោកជំទាវបានអរគុណចំពោះព័ត៌មានស្ដីពីវឌ្ឍនភាពផលិតកម្ម ការពង្រីករោងចក្រ ការប្រមូលទិញបន្លែនិងផ្លែឈើ និងសក្ដានុពលនាំចេញកសិផល ជាពិសេសដំណាប់ស្វាយទៅប្រទេសចិន សហរដ្ឋអាមេរិក និងអឺរ៉ុប។
រដ្ឋមន្ត្រីបានបញ្ជាក់ថា ក្រសួងនឹងគាំទ្រគម្រោងពង្រីករោងចក្រកែច្នៃបន្លែ ផ្លែឈើ និងកសិផលទាំងនេះ ដែលជាផ្នែកនៃយុទ្ធសាស្ត្រនាំកសិផលកម្ពុជាទៅទីផ្សារអន្តរជាតិ។
លោកជំទាវក៏បានណែនាំអំពីទីផ្សារសក្ដានុពលផ្សេងទៀតដែលមានកិច្ចព្រមព្រៀងពាណិជ្ជកម្មសេរីជាមួយកម្ពុជា និងពន្យល់អំពីគោលនយោបាយពាណិជ្ជកម្ម កិច្ចសម្រួលពាណិជ្ជកម្ម ការលើកទឹកចិត្ត និងយន្តការគាំទ្ររបស់រដ្ឋាភិបាល ដើម្បីបង្កើនសមត្ថភាពផលិត កែច្នៃ និងប្រកួតប្រជែងរបស់វិស័យឯកជនកម្ពុជា។
លោកជំទាវបានសង្កត់ធ្ងន់ពីសារៈសំខាន់នៃកិច្ចសហការរវាងរដ្ឋាភិបាលនិងវិស័យឯកជន ដោយថាការពង្រឹងសមត្ថភាពអ្នកផលិត អ្នកកែច្នៃ និងអ្នកនាំចេញអាចជួយជំរុញការនាំចេញ ពង្រីកចំណែកទីផ្សារ និងលើកកម្ពស់ភាពប្រកួតប្រជែងអន្តរជាតិរបស់កម្ពុជា។
សេចក្ដីរាយការណ៍រួមរបស់ស្ថានីយទូរទស្សន៍
