ស្ថានីយទូរទស្សន៍ខេត្តព្រះសីហនុ ថ្ងៃទី២១ ខែសីហា។ កាលពីម្សិលមិញ រដ្ឋមន្ត្រីក្រសួងមហាផ្ទៃ ស សុខា បានអំពាវនាវឱ្យពលរដ្ឋគ្រប់សាសនាបន្តសាមគ្គី និងគាំទ្រកម្លាំងជួរមុខ រួមមានកងយោធពលខេមរភូមិន្ទ និងនគរបាលការពារព្រំដែន។ លោកថាកម្លាំងទាំងនេះកំពុងការពារបូរណភាពទឹកដីនិងអធិបតេយ្យភាព ក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត។
លោកថ្លែងក្នុងទិវាជាតិអន្តរសាសនាប្រឆាំងអំពើជួញដូរមនុស្ស ថ្ងៃទី២០ ខែសីហា នៅមជ្ឈមណ្ឌលសន្និបាតនិងពិព័រណ៍អន្តរជាតិជ្រោយចង្វារ រាជធានីភ្នំពេញ។ ប្រធានបទផ្ដោតលើសុខដុមនីយកម្មសាសនាជាកម្លាំងប្រឆាំងការជួញដូរមនុស្សគ្រប់ទម្រង់ ក្នុងសម័យបច្ចេកវិទ្យាទំនើប។
លោក ស សុខា ថាកងទ័ពនិងនគរបាលជួរមុខការពារអធិបតេយ្យភាពនិងបូរណភាពទឹកដី ហើយជួយរក្សាសន្តិភាពដែលជាមូលដ្ឋាននៃការអភិវឌ្ឍ។ លោកភ្ជាប់ការងារនេះនឹងការប្រឆាំងការជួញដូរមនុស្ស ដោយគណៈកម្មាធិការជាតិពាក់ព័ន្ធប្រើឱកាសនេះបន្តការងាររបស់ខ្លួន។
លោកអំពាវនាវឱ្យបន្តគាំទ្រកម្លាំងជួរមុខ និងរដ្ឋាភិបាល។ លោកបញ្ជាក់ថារាជរដ្ឋាភិបាលនីតិកាលទី៧ ក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត កំពុងអនុវត្តយុទ្ធសាស្ត្របញ្ចកោណដំណាក់កាលទី១ ដើម្បីឈានទៅចក្ខុវិស័យកម្ពុជា២០៥០។ លោកបញ្ជាក់ជាថ្មីពីការប្តេជ្ញាប្រយុទ្ធប្រឆាំងការជួញដូរមនុស្សគ្រប់ទម្រង់ និងបទល្មើសធ្ងន់ធ្ងរដែលរារាំងការអភិវឌ្ឍ។
លោកថាអ្នកកាន់សាសនាផ្សេងៗនៅកម្ពុជារស់នៅដោយសន្តិភាព គោរពគ្នា និងសហការគ្នា។ លោកចាត់ទុកសុខដុមនីយកម្មនេះជាកម្លាំងសាមគ្គីជាតិ និងការអភិវឌ្ឍសង្គម។
ស្ថានីយទូរទស្សន៍ខេត្តព្រះសីហនុ ចងក្រងព័ត៌មាន។
