ប្រធានព្រឹទ្ធសភាកម្ពុជា សម្តេច ហ៊ុន សែន បានបង្ហោះក្នុងតេឡេក្រាមផ្លូវការថា សម្តេចបានបោះចោលសញ្ញាបត្រកិត្តិយសពីគ្រឹះស្ថានថៃចំនួនបីតាំងពីយូរមកហើយ។ សម្តេចថា សញ្ញាបត្រទាំងនោះគ្មានតម្លៃសម្រាប់រក្សាទុក និងមិនធ្លាប់ជាមូលហេតុនៃមោទនភាពឡើយ។
សម្តេចរំឭកថាទទួលសញ្ញាបត្រនៅឆ្នាំ២០០១ ២០០៦ និង២០១៩។ សម្តេចថា ចំណេះដឹងរបស់សម្តេចកើតចេញពីប្រជាជន និងប្រព័ន្ធអប់រំកម្ពុជា ជាជាងសាលាថៃឬសញ្ញាបត្រទាំងនោះ។
សម្តេច ហ៊ុន សែន លើកឡើងថា សញ្ញាបត្រទាំងនោះត្រូវបានផ្តល់ក្រោយសម្តេចកាន់តំណែងជាន់ខ្ពស់ក្នុងជាតិស្រាប់ ហើយមិនបានជួយដល់ការងាររបស់សម្តេចទេ។ សម្តេចរំឭកពីតំណែងដូចខាងក្រោម។
សម្តេចថាបានក្លាយជារដ្ឋមន្ត្រីការបរទេសនៅឆ្នាំ១៩៧៩ អាយុ២៧ឆ្នាំ។
សម្តេចថាបានក្លាយជាឧបនាយករដ្ឋមន្ត្រី និងរដ្ឋមន្ត្រីការបរទេសនៅឆ្នាំ១៩៨១ អាយុ២៩ឆ្នាំ។
សម្តេចថាបានក្លាយជានាយករដ្ឋមន្ត្រីនៅឆ្នាំ១៩៨៥ អាយុ៣២ឆ្នាំ។
សម្តេចថាគ្រឹះស្ថានទាំងនោះជាអ្នកស្នើឱ្យសម្តេចទទួលសញ្ញាបត្រ និងភ្ជាប់ការវាយតម្លៃពីស្នាដៃរបស់សម្តេច។ សម្តេចនឹងឱ្យខុទ្ទកាល័យផ្សព្វផ្សាយឯកសារទាំងនោះដើម្បីរំឭក។ សម្តេចថាអតីតកាលមិនអាចកែប្រែបាន ការសម្រេចទទួលឬមិនទទួលជាសិទ្ធិរបស់សម្តេច ហើយសម្តេចមិនធ្លាប់អួតអំពីសញ្ញាបត្រទេ។
តាមការរាយការណ៍ ការលើកឡើងនេះជាការឆ្លើយតបនឹងសេចក្តីប្រកាសថ្មីៗរបស់គ្រឹះស្ថានថៃមួយ អំពីការដកហូតសញ្ញាបត្រកិត្តិយស។
រៀបរៀងដោយស្ថានីយទូរទស្សន៍ខេត្តព្រះសីហនុ។
