កម្ពុជា និងខេត្តអានហ៊ុយ ចុះអនុស្សរណៈសហការបណ្តុះបណ្តាលវិជ្ជាជីវៈ

ស្ថានីយទូរទស្សន៍ខេត្តព្រះសីហនុ ថ្ងៃទី៣ ខែកញ្ញា៖ រសៀលថ្ងៃទី២ ខែកញ្ញា ក្រសួងការងារ និងបណ្តុះបណ្តាលវិជ្ជាជីវៈកម្ពុជា និងមូលនិធិអភិវឌ្ឍការអប់រំខេត្តអានហ៊ុយ ចុះអនុស្សរណៈនៅភ្នំពេញ ដើម្បីបង្កើតមជ្ឈមណ្ឌលអភិវឌ្ឍនិងបញ្ជាក់ជំនាញវិជ្ជាជីវៈកម្ពុជា–ចិន Huijiang Workshop។ ពិធីមានអធិបតីភាពរួមរបស់រដ្ឋមន្ត្រី ហេង សួរ និងលោកស្រី Ling Shuangying អគ្គលេខាធិការសម្ព័ន្ធអភិវឌ្ឍការអប់រំវិជ្ជាជីវៈអន្តរជាតិខេត្តអានហ៊ុយ។

អនុស្សរណៈមានគោលដៅពង្រឹងកិច្ចសហការអប់រំ និងបណ្តុះបណ្តាលបច្ចេកទេសនិងវិជ្ជាជីវៈ (TVET)។ ភាគីទាំងពីរនឹងរៀបចំវេទិកាបណ្តុះបណ្តាលនិងបញ្ជាក់ជំនាញ ដោយផ្តោតលើកម្មវិធីសិក្សា បណ្តុះបណ្តាលគ្រូ និងផ្លាស់ប្តូរសិស្សឱ្យស្របនឹងស្តង់ដារអន្តរជាតិ។

លោក ហេង សួរ ថា កិច្ចសហការយូរអង្វែងនឹងជួយគ្រូនិងសិស្សសម្របខ្លួននឹងការប្រែប្រួលបច្ចេកវិទ្យានិងឧស្សាហកម្ម។ លោកថាគម្រោងអាចទាក់ទាញការវិនិយោគបរទេសបន្ថែម ជាពិសេសពីចិន។

លោកស្រី Ling អរគុណកម្ពុជាចំពោះការគាំទ្រ។ លោកស្រីថាកិច្ចសហការនឹងជំរុញការបណ្តុះបណ្តាលនិងទទួលស្គាល់ជំនាញគ្នាទៅវិញទៅមក ក្នុងពាណិជ្ជកម្មអេឡិចត្រូនិក បច្ចេកវិទ្យារថយន្តថាមពលថ្មី និងវិទ្យាសាស្ត្រកុំព្យូទ័រ។

ភាគីទាំងពីរថា មជ្ឈមណ្ឌលនឹងជាជំហានសំខាន់ក្នុងកិច្ចសហការអប់រំវិជ្ជាជីវៈ និងបង្កើតឱកាសបន្ថែមសម្រាប់យុវជន។

ស្ថានីយទូរទស្សន៍ខេត្តព្រះសីហនុ រាយការណ៍សរុប។