ស្ថានីយទូរទស្សន៍ខេត្តព្រះសីហនុ ថ្ងៃទី១០ ខែកញ្ញា៖ នៅថ្ងៃទី៩ ខែកញ្ញា ក្នុងរាជធានីភ្នំពេញ រដ្ឋលេខាធិការក្រសួងការពារជាតិ ឧត្តមសេនីយ៍ឯក រ៉ាត់ ដារ៉ារ័ត្ន បានទទួលជួបលោក Jurg Montani ប្រធានគណៈប្រតិភូថ្នាក់តំបន់នៃគណៈកម្មាធិការកាកបាទក្រហមអន្តរជាតិ (ICRC) ដោយមានការអនុញ្ញាតពីលោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ លោក Montani បានបញ្ជាក់ថា ទាហានកងយោធពលខេមរភូមិន្ទ១៨នាក់ដែលត្រូវបានភាគីថៃឃុំខ្លួនមានសុវត្ថិភាពនិងសុខភាពល្អទាំងអស់។
តាមព័ត៌មាន ICRC ទើបបានចុះសួរសុខទុក្ខទាហានទាំង១៨នាក់ជាលើកទី២ ហើយបញ្ជាក់ថាសុខភាពនិងការរស់នៅរបស់ពួកគេល្អ។ បុគ្គលិកកាកបាទក្រហមក៏បានប្រគល់សំបុត្រពីគ្រួសារទៅពួកគេ និងនាំសំបុត្រឆ្លើយតបត្រឡប់មកវិញ។ ដំណើរការនេះអនុវត្តតាមអនុសញ្ញាទីក្រុងហ្សឺណែវយ៉ាងតឹងរ៉ឹង ដោយខ្លឹមសារមានតែទាហាននិងគ្រួសាររបស់ពួកគេដឹង ហើយអ្នកក្រៅមិនអាចពិនិត្យបានទេ។
លោក Jurg Montani បញ្ជាក់ជាថ្មីថា ច្បាប់មនុស្សធម៌អន្តរជាតិកំណត់មិនឱ្យបញ្ចេញរូបភាពទាហានទាំងនេះ ដើម្បីការពារឯកជនភាពនិងសេចក្តីថ្លៃថ្នូរ។
រដ្ឋាភិបាលកម្ពុជាក៏បញ្ជាក់ថា កំពុងប្រើគ្រប់យន្តការការទូតនិងច្បាប់ ដើម្បីជំរុញឱ្យថៃដោះលែងទាហាន១៨នាក់ឱ្យបានឆាប់ ដើម្បីពួកគេត្រឡប់មកប្រទេសជាតិដោយសុវត្ថិភាព និងជួបជុំគ្រួសារ។
ស្ថានីយ៍យើងចងក្រងព័ត៌មាន
