នាព្រឹកថ្ងៃទី ១១ ខែកញ្ញា ឆ្នាំ ២០២៥ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានទទួលស្វាគមន៍លោក Arturo Planell, នាយកគ្រប់គ្រងប្រចាំតំបន់អាស៊ីអាគ្នេយ៍ របស់ក្រុមហ៊ុន Visa Worldwide Pte. Limited និងសហការី ដើម្បីជួបពិភាក្សាការងារ និងពិភាក្សាអំពីការអនុវត្តជាក់ស្តែងនៃខ្លឹមសារនៃអនុស្សរណៈយោគយល់គ្នា ស្តីពីកិច្ចសហប្រតិបត្តិការជាសហការណ៍ក្នុងវិស័យទេសចរណ៍ នៅទីស្តីការក្រសួង។
ក្នុងកិច្ចប្រជុំនេះ ឯកឧត្តមរដ្ឋមន្រ្តី បានថ្លែងអំណរគុណ កោតសរសើរ និងវាយតម្លៃខ្ពស់ចំពោះកិច្ចសហការគាំទ្ររបស់ក្រុមហ៊ុន Visa ក្នុងការផ្សព្វផ្សាយសក្តានុពលទេសចរណ៍កម្ពុជា និងលើកស្ទួយកត្តាសុខសន្តិភាព ស្ថិរភាពនយោបាយ សង្គម សេដ្ឋកិច្ច និងរដ្ឋបាលសាធារណៈរបស់ប្រទេស ដល់អតិថិជន និងសហគមន៍អន្ដរជាតិ។
គូភាគីទាំងពីរ បានឯកភាពអនុវត្តជាក់ស្តែងនូវកិច្ចសហប្រតិបត្តិការដែលបានកំណត់ក្នុងអនុស្សរណៈយោគយល់គ្នា រួមមាន ការគាំទ្រគម្រោងរបស់ក្រសួងទេសចរណ៍លើការអភិវឌ្ឍប្រព័ន្ធទេសចរណ៍វៃឆ្លាត ដែលប្រើបច្ចេកវិទ្យាឌីជីថលទំនើប និងទិន្នន័យមានប្រសិទ្ធភាព សុវត្ថិភាព និងសន្តិសុខ។ ជាពិសេស គឺការពិនិត្យលទ្ធភាពសហការក្នុងការបង្កើត Tourism Satellite Account ដើម្បីពង្រីកសមត្ថភាព និងការគ្រប់គ្រងទិន្នន័យទេសចរណ៍កម្ពុជា។
ដោយ៖ ស្ថានីយទូរទស្សន៍ខេត្តព្រះសីហនុ
