ស្ថានីយទូរទស្សន៍ខេត្តព្រះសីហនុ ថ្ងៃទី១២ ខែកញ្ញា៖ តាមរបាយការណ៍ ខែសីហានេះ កម្ពុជានាំចូលទំនិញពីថៃប្រមាណ២១៣លានដុល្លារ ធ្លាក់២៩,១%ធៀបឆ្នាំមុន ដែលបង្ហាញថាពាណិជ្ជកម្មនៅតែរងឥទ្ធិពលភាពតានតឹងព្រំដែន។ តាំងពីថៃបិទព្រំដែនឯកតោភាគីនិងមានជម្លោះប្រដាប់អាវុធ ទំហំពាណិជ្ជកម្មសរុបមានទិសដៅធ្លាក់ចុះ។
ប៉ុន្តែធៀបខែមុន ការនាំចូលបានកើនពី១៦៦លានដុល្លារក្នុងខែកក្កដា ដែលបង្ហាញការងើបឡើងខ្លះនៃសកម្មភាពពាណិជ្ជកម្មក្នុងរយៈពេលខ្លី។ កម្ពុជានាំចេញទៅថៃប្រមាណ៤៦លានដុល្លារ ធ្លាក់៣៦,២%ធៀបឆ្នាំមុន ប៉ុន្តែកើនពីខែកក្កដា។
ក្នុង៨ខែដំបូងឆ្នាំ២០២៥ ពាណិជ្ជកម្មកម្ពុជា-ថៃមានប្រមាណ២៦០០លានដុល្លារ ធ្លាក់៦,៤%ធៀបឆ្នាំមុន។ ថៃនាំចេញមកកម្ពុជាមានចំណែកធំជាងគេ គឺ២១០០លានដុល្លារ ខណៈកម្ពុជានាំទៅថៃមាន៥៣៤លានដុល្លារ។ របាយការណ៍បញ្ជាក់ថា ទោះមានផលប៉ះពាល់ពីភាពតានតឹងព្រំដែន ថៃនៅតែមានចំណែកធំជាងក្នុងពាណិជ្ជកម្មទ្វេភាគី។
ស្ថានីយទូរទស្សន៍ចងក្រងផ្សាយ
