ស្ថានីយទូរទស្សន៍ខេត្តព្រះសីហនុ ថ្ងៃទី១៣ ខែកញ្ញា៖ ក្រុមហ៊ុន Etihad Airways នឹងបើកជើងហោះហើរត្រង់ពីអាប៊ុយដាប៊ី ប្រទេសអារ៉ាប់រួម មកកម្ពុជាចាប់ពីថ្ងៃទី៣ ខែតុលា ឆ្នាំ២០២៥។
នៅថ្ងៃទី១២ ខែកញ្ញា រដ្ឋមន្ត្រីទេសចរណ៍ លោក ហួត ហាក់ បានជួបលោក Charles Tan អ្នកគ្រប់គ្រងតំបន់អាស៊ីរបស់ Etihad និងក្រុមការងារ នៅទីស្តីការក្រសួង។ ភាគីទាំងពីរបានពិភាក្សាសកម្មភាពអាជីវកម្ម ជាពិសេសជើងហោះហើរអាប៊ុយដាប៊ី–ភ្នំពេញ និងកិច្ចសហការគាំទ្រនាពេលខាងមុខ។
ភាគីទាំងពីរយល់ថា ជើងហោះហើរនេះនឹងពង្រឹងការតភ្ជាប់កម្ពុជាទៅពិភពលោក និងផ្សព្វផ្សាយសក្តានុពលទេសចរណ៍នៅទីផ្សារអន្តរជាតិ។ លោក ហួត ហាក់ បានអរគុណក្រុមហ៊ុនចំពោះចក្ខុវិស័យ និងការឱ្យតម្លៃលើទេសចរណ៍កម្ពុជា ដោយចាត់ទុកការបើកជើងហោះហើរនេះជាការជឿជាក់លើទីផ្សារកំពុងរីកចម្រើន និងចក្ខុវិស័យអភិវឌ្ឍន៍របស់រាជរដ្ឋាភិបាល។
ជើងហោះហើរគ្រោងចាប់ផ្តើមថ្ងៃទី៣ ខែតុលា ឆ្នាំ២០២៥ ពីអាប៊ុយដាប៊ីមកអាកាសយានដ្ឋានអន្តរជាតិតេជោ ដើម្បីនាំអ្នកដំណើរនិងភ្ញៀវអន្តរជាតិមកបន្ថែម និងជួយវិស័យទេសចរណ៍និងសេដ្ឋកិច្ច។
ស្ថានីយបានចងក្រងព័ត៌មាននេះ។
