ប៉ូលិសភ្នំពេញឃាត់ខ្លួន៤៨នាក់ ក្នុងការឆ្មក់ទីតាំងសង្ស័យឆបោក

ស្ថានីយទូរទស្សន៍ខេត្តព្រះសីហនុ ថ្ងៃទី១៦ ខែកញ្ញា៖ ប៉ូលិសភ្នំពេញបានឆ្មក់អគារខុនដូ HANA កម្ពស់៧ជាន់ ក្នុងខណ្ឌសែនសុខ នៅម៉ោង១រសៀលកាលពីម្សិលមិញ។ អគារនេះត្រូវបានសង្ស័យថា ជាទីតាំងឆបោកតាមអនឡាញនិងជាកន្លែងស្នាក់នៅរួមខុសច្បាប់របស់ជនបរទេស។

ប៉ូលិសឃាត់ខ្លួនជនសង្ស័យ៤៨នាក់ ក្នុងនោះស្រី១០នាក់ ពី៤សញ្ជាតិ៖ កូរ៉េខាងត្បូង៣៣នាក់ រួមមានស្រី៥នាក់ បុរសនេប៉ាល់ម្នាក់ បុរសបង់ក្លាដែសម្នាក់ និងកម្ពុជា១៣នាក់ រួមមានស្រី៥នាក់។

ប៉ូលិសក៏រឹបអូសសម្ភារៈពាក់ព័ន្ធនឹងការឆបោក រួមមានកុំព្យូទ័រ៦០គ្រឿង ទូដែក៣ និងលិខិតឆ្លងដែន៣៥ក្បាល។ ជនសង្ស័យនិងវត្ថុតាងទាំងអស់ត្រូវបានប្រគល់ទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីច្បាប់។

រាជរដ្ឋាភិបាលកម្ពុជាបានចាប់ផ្ដើមយុទ្ធនាការទូទាំងប្រទេសប្រឆាំងការឆបោកតាមអនឡាញ នៅថ្ងៃទី១៤ ខែកក្កដា ឆ្នាំ២០២៥។ យុទ្ធនាការពហុស្ថាប័ននេះមានគោលដៅទប់ស្កាត់បទល្មើសឆបោកតាមទូរគមនាគមន៍និងអនឡាញ និងរក្សាសន្តិសុខជាតិនិងសណ្ដាប់ធ្នាប់សង្គម។

ប៉ូលិសបញ្ជាក់ថា នឹងចាត់វិធានការច្បាប់តឹងរ៉ឹងចំពោះអ្នករៀបចំនិងអ្នកពាក់ព័ន្ធ ដើម្បីបំបែកបណ្ដាញឆបោកតាមអនឡាញ។

សេចក្ដីរាយការណ៍សរុបដោយ KPS99TV។