នាព្រឹកថ្ងៃទី២៩ ខែកញ្ញា ឆ្នាំ២០២៥ សម្ដេច ហ៊ុន សែន ប្រមុខរដ្ឋស្តីទី ប្រធានសមាគមអតីតយុទ្ធជនកម្ពុជា និងជានាយឧត្តមសេនីយ៍ផ្កាយ៥ បានអញ្ជើញដឹកនាំមហាសន្និបាតវិសាមញ្ញតំណាងសមាគមទូទាំងប្រទេស នៅទីស្ដីការក្រសួងមហាផ្ទៃ រាជធានីភ្នំពេញ។
មានអ្នកចូលរួមប្រមាណ៤០០នាក់ រួមមានតំណាងអតីតយុទ្ធជន និងយោធិនរំសាយពីទូទាំងប្រទេស សមាជិកគណៈកម្មាធិការអចិន្ត្រៃយ៍ ថ្នាក់ដឹកនាំសមាគម និងភ្ញៀវកិត្តិយស។
ក្នុងឋានៈជាអធិបតីនៃមហាសន្និបាត សម្ដេច ហ៊ុន សែន បានសង្កត់ធ្ងន់ថា អតីតយុទ្ធជនជាទ្រព្យសម្បត្តិដ៏មានតម្លៃរបស់ជាតិ និងជាមូលដ្ឋានដ៏រឹងមាំសម្រាប់សន្តិភាពនិងការអភិវឌ្ឍ។ មហាសន្និបាតនេះមិនត្រឹមតែជាឱកាសបូកសរុប និងផ្លាស់ប្ដូរយោបល់ទេ ប៉ុន្តែក៏ជាឱកាសសំខាន់ដើម្បីជំរុញការអភិវឌ្ឍសមាគមបន្ថែមទៀត។
តំណាងចូលរួមបានពិភាក្សាយ៉ាងស៊ីជម្រៅអំពីសុខុមាលភាពអតីតយុទ្ធជន កិច្ចគាំពារសង្គម និងទិសដៅអនាគតរបស់សមាគម ដោយបង្ហាញឆន្ទៈក្នុងការបន្តដើរតួនាទីវិជ្ជមាននៅក្នុងសម័យថ្មី។
រៀបរៀងដោយក្រុមការងារព័ត៌មានរបស់ស្ថានីយ
