ការនាំចេញកង់របស់កម្ពុជាកើនជិត៤៦% ដោយមានអត្ថប្រយោជន៍ផ្នែកតម្លៃនិងគុណភាព

តាមទិន្នន័យថ្មីរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ការនាំចេញកង់និងកង់អគ្គិសនីរបស់កម្ពុជាក្នុង៨ខែដើមឆ្នាំ២០២៥ មានទឹកប្រាក់ប្រមាណ៤០៨,៥លានដុល្លារអាម៉េរិក កើនជិត៤៦% ធៀបនឹង២៧៩លានដុល្លារក្នុងរយៈពេលដូចគ្នាឆ្នាំមុន។

ទិន្នន័យបង្ហាញថា ចាប់តាំងពីឆ្នាំ២០២០ កម្ពុជាបានក្លាយជាប្រទេសផ្គត់ផ្គង់កង់ធំបំផុតទៅអឺរ៉ុប ដោយមានចំណែក២៤% នៃការនាំចូលសរុបរបស់សហភាពអឺរ៉ុប លើសចិនដីគោកដែលមាន១៧% និងតៃវ៉ាន់ ប្រទេសចិន ដែលមាន១១%។ អ្នកក្នុងវិស័យយល់ថា អត្ថប្រយោជន៍ផ្នែកតម្លៃនិងគុណភាពជាកត្តាស្នូលនៃកំណើនការនាំចេញកង់កម្ពុជា។

បច្ចុប្បន្ន កង់កម្ពុជានាំចេញជាចម្បងទៅសហរដ្ឋអាម៉េរិក អាល្លឺម៉ង់ ចក្រភពអង់គ្លេស ជប៉ុន ចិន និងបណ្ដាប្រទេសអាស៊ាន។ ទីផ្សារក៏រួមមានបែលហ្សិក ហូឡង់ អូទ្រីស ស៊ុយអែត ដាណឺម៉ាក អូស្ត្រាលី ឆែក អ៊ីតាលី កូឡុំប៊ី កូរ៉េខាងត្បូង អេស្ប៉ាញ និងកាណាដា។

កម្ពុជាមានសហគ្រាសនាំចេញកង់ធំៗ៥ គឺ Evergrand Bicycle (Cambodia), Speedtech Industrial Co., Ltd, Smart Tech (Cambodia) Co., Ltd, A and J (Cambodia) Co., Ltd និង XDS Bicycle (Cambodia) Co., Ltd។ ដើម្បីពង្រីកសមត្ថភាពផលិត ក្រុមប្រឹក្សាអភិវឌ្ឍន៍កម្ពុជាបានអនុម័តនៅខែមេសា ឆ្នាំ២០២៤ ឱ្យ Lingrich Bicycle (Cambodia) Co., Ltd វិនិយោគ៧,២លានដុល្លារសាងសង់រោងចក្រកង់ កង់អគ្គិសនី និងគ្រឿងបន្លាស់ នៅតំបន់សេដ្ឋកិច្ចពិសេសតាយសេងបាវិត។

អ្នកជំនាញលើកឡើងថា ការបង្កើនសមត្ថភាពផលិតនិងការពង្រីកទីផ្សារនាំចេញ អាចជួយឱ្យឧស្សាហកម្មកង់កម្ពុជាបន្តកំណើនរឹងមាំ និងពង្រឹងភាពប្រកួតប្រជែងក្នុងទីផ្សារពិភពលោក។

សេចក្ដីរាយការណ៍សរុបដោយស្ថានីយទូរទស្សន៍យើង