កម្ពុជានិងអាមេរិកថ្មីៗនេះបានបញ្ចប់ការចរចាពាណិជ្ជកម្មរយៈពេលបួនថ្ងៃនៅវ៉ាស៊ីនតោន ដោយពិភាក្សាស៊ីជម្រៅអំពីកិច្ចព្រមព្រៀងពាណិជ្ជកម្មទៅវិញទៅមក ប៉ុន្តែមិនទាន់ប្រកាសលទ្ធផលចុងក្រោយ។
តាមរដ្ឋាភិបាលកម្ពុជា ឧបនាយករដ្ឋមន្ត្រី ស៊ុន ចាន់ថុល ប្រធានគណៈកម្មាធិការសម្របសម្រួលពាណិជ្ជកម្មនិងវិនិយោគកម្ពុជា-អាមេរិក និងរដ្ឋមន្ត្រីក្រសួងពាណិជ្ជកម្ម ចម និម្មល បានដឹកនាំគណៈប្រតិភូកម្ពុជា ខណៈតំណាងពាណិជ្ជកម្មអាមេរិក Jamieson Greer ដឹកនាំភាគីអាមេរិក។ ភាគីទាំងពីរបានទទួលស្គាល់វឌ្ឍនភាពជុំចរចាមុន និងពិភាក្សាវិធីពង្រឹងទំនាក់ទំនងសេដ្ឋកិច្ចនិងពាណិជ្ជកម្ម។
កម្ពុជាថា ចំណុចសំខាន់នៃការចរចាគឺបន្ថយពន្ធអាមេរិកលើទំនិញនាំចេញកម្ពុជា ជាពិសេសទំនិញប្រាំពីរក្រុម រួមមានសម្លៀកបំពាក់ ស្បែកជើង និងសម្ភារៈធ្វើដំណើរ។ ឧស្សាហកម្មទាំងនេះផ្ដល់ការងារប្រមាណ ១ លានកន្លែង និងជួយសេដ្ឋកិច្ចជាតិ។ កម្ពុជាយល់ថាផលិតផលទាំងនេះមិនប្រកួតដោយផ្ទាល់ជាមួយឧស្សាហកម្មអាមេរិកទេ ហើយពន្ធទាបនឹងទាក់ទាញអ្នកវិនិយោគមកបង្កើតរោងចក្របន្ថែម។
អាមេរិកបានបន្ថយពន្ធទៅវិញទៅមកលើទំនិញកម្ពុជាពី ៤៩% មក ១៩% ខណៈកម្ពុជាលុបពន្ធទាំងអស់លើទំនិញនាំចូលពីអាមេរិក ដើម្បីជំរុញពាណិជ្ជកម្មឱ្យមានតុល្យភាពជាងមុន។
កម្ពុជាសង្ឃឹមបញ្ចប់អត្ថបទកិច្ចព្រមព្រៀងត្រឹមចុងខែតុលា និងប្រកាសលទ្ធផលមុនប្រធានាធិបតី ត្រាំ ចូលរួមកិច្ចប្រជុំកំពូលអាស៊ាន។
អាមេរិកនៅតែជាទីផ្សារនាំចេញធំបំផុតរបស់កម្ពុជា។ តាមទិន្នន័យគយ ក្នុងឆ្នាំ២០២៥ រយៈពេលប្រាំបីខែដំបូង កម្ពុជានាំចេញទៅអាមេរិកបាន៨.៣១ពាន់លានដុល្លារ កើន២៣.២%ធៀបនឹងឆ្នាំមុន ខណៈការនាំចូលមាន២៤៣លានដុល្លារ កើន៣៩.៨%។
កិច្ចចរចានេះត្រូវបានមើលថាជាចំណុចសំខាន់នៃទំនាក់ទំនងសេដ្ឋកិច្ចទ្វេភាគី និងបង្ហាញការស្វែងរកកិច្ចសហប្រតិបត្តិការដែលយុត្តិធម៌និងផ្ដល់ផលប្រយោជន៍ទៅវិញទៅមក ក្នុងបរិបទពាណិជ្ជកម្មពិភពលោកកំពុងប្រែប្រួល។
រាយការណ៍សរុបដោយស្ថានីយនេះ
