នៅថ្ងៃទី៩ ខែវិច្ឆិកា កម្លាំងអនុវត្តច្បាប់ចម្រុះកម្ពុជាបានចុះបង្ក្រាបទីតាំងសង្ស័យឆបោកទូរគមនាគមន៍មួយក្នុងក្រុងព្រះសីហនុ ខេត្តព្រះសីហនុ។ ប្រតិបត្តិការនេះបានឃាត់ខ្លួនអ្នកសង្ស័យពាក់ព័ន្ធ២៦៣នាក់ និងដកហូតឧបករណ៍អេឡិចត្រូនិកជាច្រើនដែលប្រើសម្រាប់ការឆបោកតាមអ៊ីនធឺណិត។
ទីតាំងនេះនៅក្រុមទី៦ ភូមិ៤ សង្កាត់លេខ៤ ជាអតីតកាស៊ីណូ Galaxy World។ សមត្ថកិច្ចបានដកហូតកុំព្យូទ័រលើតុ៨៦០គ្រឿង ទូរសព្ទ៤.១២៩គ្រឿង កុំព្យូទ័រយួរដៃ១៦គ្រឿង និង iPad ១៤គ្រឿង ជាភស្តុតាងសម្រាប់ការស៊ើបអង្កេត។
អ្នកត្រូវឃាត់ខ្លួនរួមមាន ជនជាតិចិន២០៧នាក់ ប៉ាគីស្ថាន១១នាក់ បង់ក្លាដេស២៣នាក់ ស្ត្រីមីយ៉ាន់ម៉ា៦នាក់ នេប៉ាល់៤នាក់ វៀតណាម៧នាក់ ម៉ាឡេស៊ី៤នាក់ និងស្ត្រីឡាវម្នាក់។ ប្រតិបត្តិការសម្របសម្រួលដោយលេខាធិការដ្ឋានគណៈកម្មាធិការជាតិប្រឆាំងការឆបោកទូរគមនាគមន៍ ដោយមានការចូលរួមពីអគ្គស្នងការដ្ឋាននគរបាលជាតិ អគ្គនាយកដ្ឋានអន្តោប្រវេសន៍ គណៈបញ្ជាការឯកភាពខេត្ត និងអាជ្ញាធរមូលដ្ឋាន ព្រមទាំងការសម្របសម្រួលនីតិវិធីពីព្រះរាជអាជ្ញារងអមសាលាដំបូងខេត្ត។
ការស៊ើបអង្កេតកំពុងបន្ត។ ជនសង្ស័យនិងវត្ថុតាងបានប្រគល់ជូនអគ្គនាយកដ្ឋានអន្តោប្រវេសន៍និងស្ថាប័នពាក់ព័ន្ធ ខណៈអគារត្រូវបានបិទបណ្ដោះអាសន្ន និងប្រគល់ឱ្យនគរបាលសង្កាត់លេខ៤គ្រប់គ្រង។ នគរបាលថា ប្រតិបត្តិការនេះជាផ្នែកនៃយុទ្ធនាការទូទាំងប្រទេស ហើយនឹងបន្តចាត់ការតាមច្បាប់យ៉ាងតឹងរ៉ឹងចំពោះការឆបោកតាមអ៊ីនធឺណិតនិងទូរគមនាគមន៍។
ស្ថានីយនេះចងក្រង។
