ដំណឹងសាកល្បងលើកលែងទិដ្ឋាការជំរុញការស្វែងរកជើងហោះហើរពីចិនមកកម្ពុជាកើនខ្លាំង

ថ្មីៗនេះ រដ្ឋាភិបាលកម្ពុជាបានចេញឯកសារផ្លូវការប្រកាសថា នឹងសាកល្បងគោលនយោបាយលើកលែងទិដ្ឋាការសម្រាប់ពលរដ្ឋចិន ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដោយអាចស្នាក់នៅ១៤ថ្ងៃ។ ក្នុងអំឡុងការសាកល្បងរយៈពេល៤ខែ អ្នកទេសចរចិនមិនចាំបាច់ស្នើសុំទិដ្ឋាការជាមុន ឬបង់ថ្លៃឡើយ គ្រាន់តែបំពេញប័ណ្ណចូលប្រទេសអេឡិចត្រូនិកក៏អាចចូលបាន ហើយអាចធ្វើដំណើរចេញចូលកម្ពុជាច្រើនលើក។

តាមទិន្នន័យក្រសួងទេសចរណ៍កម្ពុជា ចាប់ពីខែមករា ដល់ខែតុលាឆ្នាំនេះ កម្ពុជាបានទទួលអ្នកទេសចរចិនប្រមាណ១លាននាក់ ហើយចិននៅតែជាប្រទេសប្រភពអ្នកធ្វើដំណើរទេសចរណ៍ និងធុរកិច្ចដ៏សំខាន់មួយរបស់កម្ពុជា។ ក្រោយប្រកាសដំណឹងលើកលែងទិដ្ឋាការ ការស្វែងរកពាក់ព័ន្ធនៅលើវេទិកាទេសចរណ៍បានកើនឡើងយ៉ាងឆាប់រហ័ស បង្ហាញពីការឆ្លើយតបវិជ្ជមានរបស់ទីផ្សារចំពោះគោលនយោបាយនេះ។

តាមព័ត៌មានដែលទទួលបាន ការស្វែងរកពាក្យគន្លឹះពាក់ព័ន្ធនឹងកម្ពុជានៅលើ Trip.com បានកើនឡើង២០% នៅថ្ងៃប្រកាសគោលនយោបាយ បើប្រៀបធៀបនឹងរយៈពេលមុន។ ទិន្នន័យ Qunar បង្ហាញថា ការស្វែងរកសំបុត្រយន្តហោះទៅភ្នំពេញ និងសៀមរាបបានកើនខ្លាំងក្នុងរយៈពេលខ្លី៖ ការស្វែងរកជើងហោះហើរពីសៀងហៃ ប៉េកាំង និងសិនជិនទៅភ្នំពេញ បានកើនឡើង៥,២ដង ៤,៣ដង និង៣ដងរៀងគ្នា បើប្រៀបនឹងម៉ោងមុន។ ការស្វែងរកពីសៀងហៃទៅសៀមរាបកើន៥ដង និងពីក្វាងចូវទៅសៀមរាបកើន៣,៧ដង។ ទិន្នន័យ Tongcheng Travel ក៏បង្ហាញថា ចាប់ពីថ្ងៃទី២ ខែធ្នូ ដល់ព្រឹកថ្ងៃទី៣ ខែធ្នូ ការស្វែងរកផ្លូវហោះហើរពេញនិយមពីទីក្រុងធំៗរបស់ចិនមកកម្ពុជាបានកើនលើស១០០% បើប្រៀបធៀបនឹងរយៈពេលមុន។

សេចក្ដីរាយការណ៍សរុបរបស់ស្ថានីយយើង