កាលពីថ្ងៃមុន ប៉ូលិសវៀតណាមបានផ្សព្វផ្សាយព័ត៌មានពីនាយកដ្ឋាននគរបាលព្រហ្មទណ្ឌនៃក្រសួងនគរបាលវៀតណាម អំពីប្រតិបត្តិការបង្ក្រាប និងបំបែកក្រុមឧក្រិដ្ឋកម្មមួយ។ ក្រុមនេះសង្ស័យថាមានជនជាតិវៀតណាមសហការជាមួយជនជាតិចិន ធ្វើសកម្មភាពនៅកម្ពុជា ដោយក្លែងជាអ្នកជោគជ័យ ដើម្បីអូសទាញស្ត្រីឱ្យវិនិយោគ រួចឆបោកប្រាក់។
កាសែតនគរបាលប្រជាជនវៀតណាមបានចុះផ្សាយព័ត៌មាននេះកាលពីថ្ងៃមុន។ សេចក្ដីរាយការណ៍ថា នៅថ្ងៃទី១៧ ខែវិច្ឆិកា ក្រោយការស៊ើបអង្កេតមួយរយៈ ក្រោមការណែនាំរបស់ក្រសួងនគរបាលវៀតណាម អាជ្ញាធរវៀតណាមបានសហការជាមួយប៉ូលិសកម្ពុជាដាក់ចេញប្រតិបត្តិការព្រមគ្នា។ ភាគីកម្ពុជាចាប់ខ្លួនជនសង្ស័យជាច្រើន រឹបអូសកុំព្យូទ័រ ទូរសព្ទ និងភស្តុតាងផ្សេងៗ រួចប្រគល់ជនសង្ស័យនៅច្រកព្រំដែន Mộc Bài។ ភាគីវៀតណាមរៀបចំការទទួល និងចាប់ខ្លួនក្រោយជនសង្ស័យបំពេញបែបបទចូលប្រទេស។
នាយកដ្ឋាននគរបាលព្រហ្មទណ្ឌបានរកឃើញថា ក្រុមនេះបានកេងយកប្រាក់ជិត១៤០ពាន់លានដុងពីជនរងគ្រោះជិត៥០០នាក់ទូទាំងវៀតណាម។ ស្ថាប័នស៊ើបអង្កេតបានបើកសំណុំរឿង និងចោទប្រកាន់ជនជាប់ចោទ៣២នាក់ ពីបទប្រើបណ្ដាញកុំព្យូទ័រ បណ្ដាញទូរគមនាគមន៍ និងមធ្យោបាយអេឡិចត្រូនិក ដើម្បីកេងយកទ្រព្យសម្បត្តិ។ ការស៊ើបអង្កេតកំពុងបន្តពង្រីកទៅលើការលាងលុយ ការជួញដូរមនុស្ស និងការទិញលក់គណនីធនាគារ។
តាមសេចក្ដីរាយការណ៍ ក្រុមនេះបង្កើតសេណារីយ៉ូឆបោកយ៉ាងម៉ត់ចត់ និងបែងចែកតួនាទីច្បាស់ ដោយប្រើគណនីបណ្ដាញសង្គមបង្កើតរូបភាពជា«អ្នកជោគជ័យ» ដើម្បីស្គាល់ និងអូសទាញជនរងគ្រោះ ដែលភាគច្រើនជាស្ត្រីមានជីវភាពធូរធារ នៅលីវ លែងលះ ឬមានបញ្ហាគ្រួសារ។ ក្រោយបង្កើតទំនុកចិត្ត ពួកគេលួងឱ្យចូលរួម«វិនិយោគ»និង«សន្សំ» ដោយសន្យាការប្រាក់ខ្ពស់ ដូចជា៦%ក្នុងមួយខែ និងបង់ការប្រាក់រៀងរាល់ថ្ងៃ ដើម្បីអូសទាញឱ្យដាក់ប្រាក់បន្ថែម។
ជនសង្ស័យក៏បង្កើតគេហទំព័រមានឈ្មោះស្រដៀងម៉ាកល្បី និងប្រើគណនីធនាគារឈ្មោះស្រដៀងគ្នា ដើម្បីបង្កើនភាពជឿជាក់។ ពួកគេណែនាំឱ្យទាញយកកម្មវិធីក្លែងក្លាយ ដែលមានមុខងារ«សេវាអតិថិជន»និង«ដកការប្រាក់» ដើម្បីបោកឱ្យផ្ទេរប្រាក់។ ពេលប្រាក់ដាក់ដល់កម្រិតមួយ ក្រុមនេះចាប់ផ្ដើមរារាំងការដកប្រាក់ និងប្រើហេតុផល«បង់ពន្ធ»ឬ«ពិនិត្យប្រាក់កខ្វក់» ដើម្បីបង្ខំឱ្យជនរងគ្រោះបង់បន្ថែម ហើយចាក់សោគណនីនៅពេលពួកគេមិនអាចបង់ទៀត។