ស្ថានីយទូរទស្សន៍ខេត្តព្រះសីហនុរាយការណ៍ថ្ងៃទី២៧ ខែកក្កដាថា អ្នកនាំពាក្យក្រសួងការពារជាតិកម្ពុជាបានចេញសេចក្តីថ្លែងការណ៍នៅថ្ងៃនោះ ដោយបដិសេធយ៉ាងខ្លាំងចំពោះព័ត៌មានមិនពិតដែលភាគីឈ្លានពានថៃបានផ្សព្វផ្សាយថា កម្ពុជាបានបាញ់គ្រាប់រ៉ុក្កែត BM-21 ទៅប្រាសាទតាមាន់។
លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានធ្វើសេចក្តីបញ្ជាក់ខាងលើនៅថ្ងៃនោះ ក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រី ស្តីពីស្ថានការណ៍នៃការរំលោភលើអធិបតេយ្យភាពកម្ពុជាពីសំណាក់ថៃ។
លោកជំទាវបានថ្លែងថា ប្រាសាទតាមាន់ត្រូវបានសាងសង់ដោយបុព្វបុរសខ្មែរ និងជាកម្មសិទ្ធិស្របច្បាប់នៅក្នុងដែនអធិបតេយ្យភាពកម្ពុជា ដោយផ្អែកលើផែនទីស្របច្បាប់។
លោកជំទាវបានបញ្ជាក់ថា ប្រាសាទតាមាន់ស្ថិតក្នុងខេត្តឧត្ដរមានជ័យនៃប្រទេសកម្ពុជា ហេតុនេះកម្ពុជាគ្មានហេតុផលណាមួយក្នុងការបំផ្លាញមរតកវប្បធម៌ និងទ្រព្យសម្បត្តិដ៏មានតម្លៃរបស់ខ្លួនឡើយ។ ផ្ទុយទៅវិញ លោកជំទាវបានចាត់ទុកទង្វើបំផ្លាញដោយចេតនានេះថា កើតចេញពីចេតនាទុច្ចរិតរបស់ភាគីថៃ។
ឧត្តមសេនីយ៍ឯក ម៉ាលី សុជាតា ក៏បានសង្កត់ធ្ងន់ថា ភាគីថៃតែងតែបំភ្លៃ ប្រឌិត និងផ្សព្វផ្សាយព័ត៌មានមិនពិត ដើម្បីបង្ខូចកេរ្តិ៍ឈ្មោះកម្ពុជា ដោយគ្មានមូលដ្ឋានការពិតទាល់តែសោះ ហើយក្រសួងការពារជាតិបដិសេធ និងថ្កោលទោសយ៉ាងខ្លាំង។ លោកជំទាវបានថ្លែងថា ការចោទប្រកាន់បែបនេះគ្មានមូលដ្ឋាន និងខ្វះការទទួលខុសត្រូវ ដោយប៉ុនប៉ងលាក់បាំងការរំលោភអធិបតេយ្យភាពកម្ពុជាម្តងហើយម្តងទៀតរបស់ភាគីថៃ បំភាន់ការយកចិត្តទុកដាក់របស់សហគមន៍អន្តរជាតិ និងបិទបាំងទង្វើរំលោភច្បាប់អន្តរជាតិរបស់ខ្លួន។
លោកជំទាវបានថ្លែងថា កងទ័ពថៃបានវាយប្រហារគោលដៅជាច្រើន និងជាញឹកញាប់បានបំផ្លាញហេដ្ឋារចនាសម្ព័ន្ធស៊ីវិលកម្ពុជា រួមមានភូមិ ផ្សារ វត្តអារាម មណ្ឌលសុខភាព តំបន់លំនៅឋាន និងប្រាសាទព្រះវិហារ ដែលជាបេតិកភណ្ឌវប្បធម៌ពិភពលោក។
លោកជំទាវបានថ្លែងយ៉ាងម៉ឺងម៉ាត់ថា៖ «ការវាយប្រហារយោធាទាំងនេះបានបណ្តាលឱ្យជនស៊ីវិលគ្មានអាវុធជាច្រើននាក់ស្លាប់ និងរងរបួស ជាពិសេសស្ត្រី កុមារ និងមនុស្សចាស់ ដែលកំពុងស្ថិតក្នុងគ្រោះថ្នាក់យ៉ាងធ្ងន់ធ្ងរ។ ទង្វើបែបនេះមិនត្រឹមតែរំលោភយ៉ាងធ្ងន់ធ្ងរលើគោលការណ៍មនុស្សធម៌ប៉ុណ្ណោះទេ ថែមទាំងឃោរឃៅ គ្មានមនុស្សធម៌ និងរំលោភទាំងស្រុងលើច្បាប់មនុស្សធម៌អន្តរជាតិ និងអនុសញ្ញាទីក្រុងហ្សឺណែវផងដែរ។»
ជាចុងក្រោយ អ្នកនាំពាក្យបានអំពាវនាវឱ្យយោធាថៃបញ្ឈប់ការផ្សព្វផ្សាយព័ត៌មានមិនពិតជាបន្ទាន់ បញ្ឈប់ការយកពាក្យកុហកធ្វើជាលេសដើម្បីធ្វើឱ្យអំពើឈ្លានពានរបស់ខ្លួនមើលទៅល្អ ហើយជំរុញឱ្យសហគមន៍អន្តរជាតិទាមទារឱ្យភាគីថៃទទួលខុសត្រូវ និងបញ្ឈប់រាល់សកម្មភាពឈ្លានពាន និងអំពើឃោរឃៅជាបន្ទាន់។
រាយការណ៍សរុបដោយស្ថានីយទូរទស្សន៍នេះ
