ស្ថានីយទូរទស្សន៍ខេត្តព្រះសីហនុរាយការណ៍ថ្ងៃទី២៧ ខែកក្កដាថា អភិបាលខេត្តព្រះសីហនុ ឯកឧត្តម ម៉ាង ស៊ីណេត បានថ្លែងសុន្ទរកថាប្រកបដោយមនោសញ្ចេតនានៅថ្ងៃនោះ ដោយថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋ និងសប្បុរសជនទាំងអស់ដែលបានឆ្លើយតបយ៉ាងសកម្ម និងចូលរួមដោយទឹកចិត្តពិតប្រាកដ។
ប៉ុន្មានថ្ងៃមកនេះ សប្បុរសជនបាននាំគ្នាបរិច្ចាគប្រាក់ ស្បៀងអាហារ សម្ភារប្រើប្រាស់ប្រចាំថ្ងៃ ថ្នាំពេទ្យសង្គ្រោះបន្ទាន់ និងសម្ភារផ្សេងៗ ដើម្បីគាំទ្រកងទ័ពកម្ពុជាដ៏អង់អាចក្លាហាន ដែលកំពុងការពារបូរណភាពទឹកដីជាតិនៅសមរភូមិមុខ ព្រមទាំងជួយរៀបចំកន្លែងស្នាក់នៅសម្រាប់ប្រជាពលរដ្ឋដែលកំពុងជម្លៀស និងផ្លាស់ទីទៅកាន់ទីកន្លែងមានសុវត្ថិភាព។
ឯកឧត្តម ម៉ាង ស៊ីណេត បានលើកឡើងថា ការចូលរួមយ៉ាងសកម្មរបស់ប្រជាពលរដ្ឋទាំងមូល បង្ហាញពីការរួបរួមសាមគ្គីទូទាំងប្រទេស ដើម្បីប្រឈមមុខនឹងសត្រូវរួម និងទឹកចិត្តស្នេហាជាតិដ៏ជ្រាលជ្រៅនិងមុតមាំ។ សកម្មភាពសាមគ្គីទាំងនេះមិនត្រឹមតែផ្តល់ការគាំទ្រផ្នែកសម្ភារដល់យុទ្ធជនរបស់យើងនៅសមរភូមិមុខប៉ុណ្ណោះទេ ប៉ុន្តែថែមទាំងជាការលើកទឹកចិត្ត និងកម្លាំងគាំទ្រផ្នែកស្មារតីដ៏ធំធេងផងដែរ។
ឯកឧត្តមបានមានប្រសាសន៍ថា៖ «ខ្មែរជួយខ្មែរ ការរួបរួមគ្នានៅពេលប្រទេសជាតិប្រឈមគ្រោះអាសន្ន គឺជាប្រពៃណីដ៏ឧត្តុង្គឧត្តមរបស់ជាតិយើង និងជាកម្លាំងសំខាន់ក្នុងការការពារប្រទេសជាតិ និងប្រជាពលរដ្ឋ។ ដរាបណាការគំរាមកំហែងពីខាងក្រៅនៅតែមាន ការតស៊ូរបស់យើងនឹងមិនបញ្ឈប់ឡើយ។»
ជាចុងក្រោយ ឯកឧត្តម ម៉ាង ស៊ីណេត បានអំពាវនាវឱ្យបន្តការរួបរួមសាមគ្គី និងឈរយ៉ាងមុតមាំជាមួយកងទ័ពនៅសមរភូមិមុខ ដើម្បីរួមគ្នាការពារសន្តិភាព និងបូរណភាពទឹកដីជាតិ។
អ្នកយកព័ត៌មាន៖ Chenda Teyte
អ្នកកែសម្រួល៖ 赵毅
