ស្ថានីយទូរទស្សន៍ខេត្តព្រះសីហនុ រាយការណ៍ថ្ងៃទី៣០ ខែកក្កដា។ នៅថ្ងៃដដែល ធនាគារជាតិនៃកម្ពុជាបានចេញសេចក្តីណែនាំស្តីពីការបន្ធូរបន្ថយបន្ទុកហិរញ្ញវត្ថុ ដើម្បីសម្រាលសម្ពាធសេដ្ឋកិច្ចលើអ្នកដែលរងផលប៉ះពាល់ពីជម្លោះព្រំដែនកម្ពុជា–ថៃ។
ធនាគារជាតិបានឱ្យដឹងថា សេចក្តីណែនាំនេះត្រូវបានចេញបន្ទាប់ពីបានពិគ្រោះយោបល់យ៉ាងទូលំទូលាយជាមួយសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា។ គោលបំណងគឺឆ្លើយតបនឹងការអំពាវនាវរបស់នាយករដ្ឋមន្ត្រី ហ៊ុន ម៉ាណែត និងផ្តល់ជំនួយជាក់ស្តែងដល់ប្រជាពលរដ្ឋដែលរងផលប៉ះពាល់ ក្នុងស្មារតីមនុស្សធម៌ សាមគ្គីភាព និងការជួយគ្នាទៅវិញទៅមក។
សេចក្តីណែនាំតម្រូវឱ្យធនាគារ និងគ្រឹះស្ថានហិរញ្ញវត្ថុ ផ្តល់ការអនុគ្រោះខាងក្រោមដល់អតិថិជនជាអ្នកខ្ចីដែលត្រូវភៀសខ្លួនដោយសារជម្លោះ ចាប់ពីថ្ងៃទី៣០ ខែកក្កដា ដល់ថ្ងៃទី៣១ ខែតុលា ឆ្នាំ២០២៥៖
១. លើកលែងកម្រៃ និងប្រាក់ពិន័យទាំងអស់ដែលពាក់ព័ន្ធនឹងឥណទាន។
២. ផ្អាកការបង់ការប្រាក់លើឥណទានក្នុងរយៈពេលនេះ។
៣. ពន្យារការសងប្រាក់ដើមនៃឥណទានក្នុងរយៈពេលនេះ។
៤. មិនត្រូវបូកបញ្ចូលការប្រាក់ទៅក្នុងប្រាក់ដើមក្នុងរយៈពេលខាងលើ។
សេចក្តីណែនាំក៏កំណត់វិធានការអនុគ្រោះដល់យោធិនដែលមានលក្ខណសម្បត្តិគ្រប់គ្រាន់ និងឥណទានដែលពាក់ព័ន្ធ៖
១. លុបចោលឥណទានរហូតដល់ ៨០ លានរៀល នៅពេលយោធិនពលីជាអ្នកខ្ចី ឬជាអ្នករួមខ្ចី។
២. លុបចោលឥណទានរហូតដល់ ១០ លានរៀល សម្រាប់អតិថិជនជាអ្នកខ្ចីដែលជាយោធិនពិការក្នុងការប្រយុទ្ធលើកនេះ។
៣. ចំពោះអតិថិជនជាអ្នកខ្ចីដែលជាយោធិនចូលរួមប្រយុទ្ធដោយផ្ទាល់ សេចក្តីណែនាំកំណត់ឱ្យលើកលែងកម្រៃនិងប្រាក់ពិន័យពាក់ព័ន្ធនឹងឥណទាន ផ្អាកការបង់ការប្រាក់ និងពន្យារការសងប្រាក់ដើម សម្រាប់រយៈពេលប្រាំមួយខែ ចាប់ពីថ្ងៃចេញសេចក្តីណែនាំរហូតដល់ថ្ងៃទី៣១ ខែមករា ឆ្នាំ២០២៦។
៤. មិនត្រូវបូកបញ្ចូលការប្រាក់ទៅក្នុងប្រាក់ដើមក្នុងរយៈពេលខាងលើ។
ជាមួយគ្នានេះ ធនាគារជាតិតម្រូវឱ្យធនាគារ និងគ្រឹះស្ថានហិរញ្ញវត្ថុ បន្តរៀបចំឥណទានឡើងវិញសម្រាប់អតិថិជនដទៃទៀតតាមបទប្បញ្ញត្តិជាធរមាន។ ធនាគារជាតិក៏លើកទឹកចិត្តឱ្យស្ថាប័នទាំងនោះផ្តល់ជំនួយបន្ថែមតាមលទ្ធភាពជាក់ស្តែងដល់ពលករដែលទើបត្រឡប់ពីប្រទេសថៃមកកម្ពុជា និងយោធិនដែលបានចូលរួមប្រយុទ្ធដោយផ្ទាល់។
រៀបរៀងដោយស្ថានីយទូរទស្សន៍ខេត្តព្រះសីហនុ
