ស្ថានីយទូរទស្សន៍ខេត្តព្រះសីហនុបានរាយការណ៍នៅថ្ងៃទី៣១ ខែកក្កដាថា លោក ហេង រតនា តំណាងរាជរដ្ឋាភិបាលកម្ពុជា និងជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានឱ្យដឹងថា ក្រុមជំនាញគ្រាប់បែកទម្លាក់ពីយន្តហោះរបស់មជ្ឈមណ្ឌលបានពិនិត្យរណ្តៅគ្រាប់បែកផ្ទុះចំនួន ៤ កន្លែង និងទីតាំងគ្រាប់បែកទម្លាក់ពីយន្តហោះដែលមិនទាន់ផ្ទុះ និងកប់ក្នុងដីចំនួន ៥ កន្លែង។ ក្រុមការងារក៏បានពិនិត្យរណ្តៅដែលបង្កឡើងដោយការធ្លាក់នៃគ្រាប់បែកមិនទាន់ផ្ទុះទាំងនោះ។
លោក ហេង រតនា បានអះអាងថា គ្រាប់បែក MK-84 មិនទាន់ផ្ទុះ និងរណ្តៅរបស់វា សុទ្ធតែបណ្តាលមកពីការទម្លាក់គ្រាប់បែករបស់កងទ័ពអាកាសថៃក្នុងការប្រយុទ្ធរយៈពេល ៥ ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥។ លោកថា ទីតាំងទាំងនេះមិនបានរងការទម្លាក់គ្រាប់បែកក្នុងអំឡុងសង្គ្រាមឥណ្ឌូចិនទេ ហើយមជ្ឈមណ្ឌលសកម្មភាពកម្ចាត់មីនកម្ពុជារក្សាទុកទិន្នន័យប្រវត្តិសាស្ត្រស្តីពីការទម្លាក់គ្រាប់បែក ដែលផ្តល់ដោយក្រសួងការបរទេសសហរដ្ឋអាមេរិក។
លោកបាននិយាយថា គ្រាប់បែកត្រកូល MK មានសញ្ញាសម្គាល់ និងប្រភពច្បាស់លាស់ ជាពិសេសមានកំណត់ត្រាលម្អិតអំពីទិន្នន័យហោះហើររបស់យន្តហោះចម្បាំង F-16 និងប្រភេទគ្រាប់បែកដែលបានទម្លាក់។ តាមលោក យន្តហោះ F-16 អាចផ្ទុកគ្រាប់បែក MK-84 ចំនួន ៤ គ្រាប់ក្នុងមួយជើងហោះហើរ។
លោកក៏បានច្រានចោលការលើកឡើងរបស់មនុស្សមួយចំនួនដែលលោកថាមានចេតនាមិនល្អ ដោយចាត់ទុកគ្រាប់បែក MK-84 ទាំងនេះថាជា «គ្រាប់បែកចាស់»។ លោកបញ្ជាក់ថា បើគ្រាប់បែកមានអាយុលើសពី ៥០ ឆ្នាំ លោហៈរបស់វានឹងរងការច្រេះស៊ីយ៉ាងខ្លាំងរួចទៅហើយ។ លោកថា រណ្តៅគ្រាប់បែកផ្ទុះ និងរណ្តៅដែលបង្កឡើងដោយគ្រាប់បែកមិនទាន់ផ្ទុះនៅទីតាំងនោះ ជាភស្តុតាងជាក់ស្តែង។ អ្នកមានមន្ទិលអាចចុះពិនិត្យផ្ទាល់ និងអញ្ជើញក្រុមអ្នកជំនាញអន្តរជាតិផ្នែកគ្រាប់បែកទម្លាក់ពីយន្តហោះមកសិក្សា និងវាយតម្លៃបន្ថែម។
រាយការណ៍រួមដោយស្ថានីយទូរទស្សន៍យើងខ្ញុំ។
