ស្ថានីយទូរទស្សន៍ខេត្តព្រះសីហនុបានរាយការណ៍នៅថ្ងៃទី៣១ ខែកក្កដាថា លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា គ្រាប់ផ្លោង និងអាវុធធុនធ្ងន់ដែលទាហានថៃបានប្រើ បានធ្វើឱ្យខូចខាតផ្លូវជាតិលេខ៥៨ ផ្លូវជាតិលេខ៦៨ និងផ្លូវខេត្តលេខ២៥៦៧ ក្នុងខេត្តឧត្តរមានជ័យ។
ក្រោយបទឈប់បាញ់រវាងកម្ពុជា និងថៃចូលជាធរមាន ក្រុមការងារមន្ទីរសាធារណការ និងដឹកជញ្ជូនខេត្តឧត្តរមានជ័យបានចុះពិនិត្យយ៉ាងលម្អិតលើផ្លូវដែលរងការខូចខាតនៅក្នុងខេត្ត រួមទាំងតំបន់ព្រំដែន ពីថ្ងៃទី២៩ ដល់ថ្ងៃទី៣០ ខែកក្កដា ឆ្នាំ២០២៥។
លទ្ធផលពិនិត្យបង្ហាញថា គ្រាប់ផ្លោងបានធ្វើឱ្យខូចផ្ទៃផ្លូវជាតិលេខ៥៨ ចំនួន ៤៩,៤០ ម៉ែត្រការ៉េ និងជើងជម្រាលប្រវែង ១០ ម៉ែត្រ ព្រមទាំងធ្វើឱ្យបេតុងស្ពានធ្លុះចំនួន ២ ម៉ែត្រការ៉េ។ ផ្ទៃកៅស៊ូផ្លូវជាតិលេខ៦៨ រងការខូចខាត ៣៦ ម៉ែត្រការ៉េ។ គ្រាប់ផ្លោងបានធ្លាក់ចំផ្លូវខេត្តលេខ២៥៦៧ ចំនួន ៧ កន្លែង បណ្ដាលឱ្យខូចផ្ទៃកៅស៊ូចំនួន ១៥០,៦០ ម៉ែត្រការ៉េ។
លោក ផន រឹម បានបញ្ជាក់ថា ផ្លូវជាតិលេខ៥៦ នៅស្រុកបន្ទាយអំពិល និងក្រុងសំរោង ក្នុងខេត្តឧត្តរមានជ័យ ជាទូទៅអាចធ្វើដំណើរបានដោយសុវត្ថិភាព ទោះបីកំណាត់ផ្លូវដែលខូចខាតខ្លះនៅតែត្រូវការជួសជុលក៏ដោយ។ លោកបានអំពាវនាវឱ្យអ្នកធ្វើដំណើរប្រុងប្រយ័ត្ននៅពេលឆ្លងកាត់កំណាត់ផ្លូវដែលរងការខូចខាត ជាពិសេសនៅពេលយប់ ដើម្បីចៀសវាងគ្រោះថ្នាក់ចរាចរណ៍។
អ្នកយកព័ត៌មាន៖ Nget Pisan
កែសម្រួល៖ Zhao Yi
