ស្ថានីយទូរទស្សន៍ខេត្តព្រះសីហនុ ថ្ងៃទី១០ ខែកញ្ញា៖ រដ្ឋាភិបាលអាមេរិកបានប្រកាសនៅថ្ងៃទី៨ ខែកញ្ញា ថាខ្លួនដាក់ទណ្ឌកម្មលើគោលដៅចំនួន១៩ ដែលពាក់ព័ន្ធនឹងបណ្តាញឆបោកនៅអាស៊ីអាគ្នេយ៍ រួមមានក្រុមហ៊ុន និងបុគ្គល។ ក្នុងនោះ គោលដៅ៩ប្រតិបត្តិការនៅមីយ៉ាន់ម៉ា និង១០មានមូលដ្ឋាននៅកម្ពុជា។ នេះជាវិធានការថ្មីរបស់រដ្ឋបាលលោក ត្រាំ ដើម្បីប្រយុទ្ធប្រឆាំងការឆបោកអនឡាញទ្រង់ទ្រាយធំក្នុងតំបន់។
ភាគីអាមេរិកចោទថា អង្គការទាំងនេះបង្ខំមនុស្សដែលត្រូវជួញដូរឱ្យធ្វើការឆបោកវិនិយោគរូបិយប័ណ្ណគ្រីបតូ និងប្រើការគំរាមហិង្សាដើម្បីបង្ខំជនរងគ្រោះឱ្យឆបោកតាមទូរគមនាគមន៍។
ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងរតនាគារអាមេរិកបាននិយាយក្នុងសេចក្តីថ្លែងការណ៍ថា គោលដៅទាំង៩នៅមីយ៉ាន់ម៉ាប្រតិបត្តិការនៅ Shwe Kokko ជាទីដែលកងទ័ពជាតិការ៉ែន (KNA) ផ្តល់ការការពារដល់មជ្ឈមណ្ឌលឆបោក។ គោលដៅទាំង១០ដែលមានមូលដ្ឋាននៅកម្ពុជាក៏ត្រូវបានចោទថាពាក់ព័ន្ធនឹងការឆបោកទ្រង់ទ្រាយធំ។ អនុរដ្ឋលេខាធិការរតនាគារ លោក Hurley បញ្ជាក់ថា ការឆបោកនេះមិនត្រឹមប៉ះពាល់សុវត្ថិភាពហិរញ្ញវត្ថុពលរដ្ឋអាមេរិកទេ ថែមទាំងធ្វើឱ្យមនុស្សរាប់ពាន់នាក់ធ្លាក់ក្នុង «ទាសភាពសម័យទំនើប»។ ឆ្នាំមុនតែមួយ អាមេរិកខាតបង់ជាង១០ពាន់លានដុល្លារដោយសារការឆបោកពីអាស៊ីអាគ្នេយ៍។
តាមព័ត៌មាន អ្នកស្វែងរកការងារជាច្រើនត្រូវបានបោកតាមការជ្រើសរើសក្លែងក្លាយឱ្យចូលមណ្ឌលឆបោក ហើយរងការជាប់បំណុល ហិង្សា ឬសូម្បីបង្ខំឱ្យលក់ផ្លូវភេទ និងបង្ខំឱ្យឆបោកមនុស្សមិនស្គាល់តាមកម្មវិធីផ្ញើសារ ឬសារទូរស័ព្ទ។
ឆ្លើយតបនឹងទណ្ឌកម្មអាមេរិកនៅថ្ងៃនោះ អ្នកនាំពាក្យក្រសួងមហាផ្ទៃកម្ពុជា លោក ទូច សុឃៈ ថា កម្ពុជាបានប្រយុទ្ធប្រឆាំងបទល្មើសអនឡាញយ៉ាងតឹងរ៉ឹងជាយូរមកហើយ ហើយបានបើកប្រតិបត្តិការធំៗមុនពេលជម្លោះព្រំដែនជាមួយថៃផ្ទុះឡើង។
លោក ទូច សុឃៈ បញ្ជាក់ថា កម្ពុជាត្រៀមសហការជាមួយគ្រប់ភាគី រួមទាំងអាមេរិក តាមរយៈកិច្ចសហការទ្វេភាគី ពហុភាគី និងសកល ដើម្បីប្រយុទ្ធនិងទប់ស្កាត់បទល្មើសអនឡាញ។ លោកថា កម្ពុជាមិនបានផ្តល់ជម្រកឱ្យក្រុមឆបោកទេ ផ្ទុយទៅវិញក៏ជាជនរងគ្រោះនៃបទល្មើសនេះដែរ។
ស្ថានីយ៍យើងចងក្រងព័ត៌មាន
