កម្ពុជានិងដៃគូចិនពិភាក្សាជំរុញទេសចរនិងជើងហោះហើរត្រង់បន្ថែម

ស្ថានីយទូរទស្សន៍ខេត្តព្រះសីហនុ ថ្ងៃទី១៦ ខែកញ្ញា៖ កាលពីម្សិលមិញ ក្រសួងទេសចរណ៍បានរៀបចំកិច្ចប្រជុំយន្តការត្រីភាគីលើកទី២ ជាមួយស្ថានទូតចិននិងក្រុមហ៊ុនទេសចរណ៍ចិនធំៗ ដើម្បីទាក់ទាញភ្ញៀវចិននិងជំរុញជើងហោះហើរត្រង់។ រដ្ឋមន្ត្រីទេសចរណ៍ ឯកឧត្តម ហួត ហាក់ ដឹកនាំកិច្ចប្រជុំអនឡាញនេះ ដោយមានឯកអគ្គរដ្ឋទូតចិន Wang Wenbin តំណាងខេត្តជាំងស៊ូនិងយូណាន China Tourism Group ក្រុមហ៊ុន Spring Airlines ប្រព័ន្ធផ្សព្វផ្សាយចិន និងមន្ត្រីកម្ពុជាចូលរួម។

ឯកឧត្តម ហួត ហាក់ ស្នើជំរុញក្រុមហ៊ុនអាកាសចរណ៍ចិនឱ្យបង្កើនការហោះហើរត្រង់ទៅសៀមរាបនិងព្រះសីហនុ ដើម្បីពង្រឹងការធ្វើដំណើរនិងការផ្លាស់ប្ដូរវប្បធម៌ទេសចរណ៍។ លោកក៏ស្វាគមន៍ការវិនិយោគពីចិន ដោយលើកឡើងពីការលើកទឹកចិត្តនិងបរិយាកាសអំណោយផលសម្រាប់វិនិយោគិននៅកម្ពុជា។

អង្គប្រជុំពិភាក្សាអំពីការអនុវត្តជាក់ស្ដែងនូវអនុស្សរណៈយោគយល់គ្នាដែលបានចុះហត្ថលេខាកន្លងមក ការរៀបចំដំណើរទស្សនកិច្ចស្វែងយល់ (Famtrip) និងការសហការផលិតភាពយន្តទេសចរណ៍។

ភាគីទាំងអស់ក៏ពិភាក្សាអំពីព្រឹត្តិការណ៍ទេសចរណ៍ធំៗ ការសម្រួលការធ្វើដំណើរ និងការតភ្ជាប់ជើងហោះហើរត្រង់បន្ថែម ដើម្បីទាក់ទាញភ្ញៀវចិននិងអន្តរជាតិឱ្យមកកម្ពុជាកាន់តែច្រើន។

សេចក្ដីរាយការណ៍សរុបដោយ KPS99TV។