មន្ត្រីកម្ពុជាលើកទឹកចិត្តឱ្យក្រុមហ៊ុនធំៗចិនមកវិនិយោគបង្កើតរោងចក្រ

តាមសារព័ត៌មានកម្ពុជា ថ្មីៗនេះ លោក សំហេង បូរ៉ា រដ្ឋលេខាធិការក្រសួងពាណិជ្ជកម្មកម្ពុជា និងប្រធានក្រុមការងារជំរុញការនាំចេញរបស់ក្រសួង បានដឹកនាំគណៈប្រតិភូទៅក្រុង Weifang និង Linyi ខេត្តសានតុង ប្រទេសចិន ដើម្បីលើកទឹកចិត្តក្រុមហ៊ុនធំៗល្បីៗរបស់ចិនឱ្យវិនិយោគបង្កើតរោងចក្រនៅកម្ពុជា និងពង្រីកឱកាសសហប្រតិបត្តិការ។

គណៈប្រតិភូបានពិភាក្សា និងទស្សនាខ្សែច្រវាក់ផលិតកម្មរបស់ក្រុមហ៊ុនសំខាន់៤ រួមមានក្រុមហ៊ុនផលិតវាយនភណ្ឌ Sunvim Group Co., Ltd. ក្រុមហ៊ុនសម្លៀកបំពាក់ Sinoer Menswear Co., Ltd. ក្រុមហ៊ុនផលិតគ្រាប់ធញ្ញជាតិ និងប្រេង Shandong Jinsheng Grain and Oil Food Co., Ltd. និងក្រុមហ៊ុន Shandong Yuhuang Grain and Oil Food Co., Ltd.។

លោក សំហេង បូរ៉ា បានលើកឡើងថា កម្ពុជាមានអត្ថប្រយោជន៍ផ្នែកកម្លាំងពលកម្ម គោលនយោបាយអនុគ្រោះ និងទីផ្សារនាំចេញ។ ប្រសិនបើក្រុមហ៊ុនចិនបង្កើតរោងចក្រនៅកម្ពុជា នោះមិនត្រឹមតែជួយលើកកម្ពស់គុណភាពកែច្នៃផលិតផលកម្ពុជាប៉ុណ្ណោះទេ ប៉ុន្តែក៏ជួយចូលទៅទីផ្សារអន្តរជាតិបានប្រសើរឡើង។ លោកបានអំពាវនាវឱ្យក្រុមហ៊ុនចាប់យកឱកាស និងសិក្សាបរិយាកាសវិនិយោគកម្ពុជាឱ្យបានស៊ីជម្រៅ។

ជាការឆ្លើយតប ក្រុមហ៊ុន Sunvim បានសន្យាថានឹងបញ្ជូនក្រុមការងារមកកម្ពុជាម្តងទៀត ដើម្បីសិក្សាលម្អិតអំពីច្បាប់វិនិយោគ លក្ខខណ្ឌប្រើប្រាស់កម្លាំងពលកម្ម និងគោលនយោបាយពាក់ព័ន្ធ។ ក្រុមហ៊ុនធ្លាប់បានសិក្សាបឋមនៅកម្ពុជារួចហើយ។ ទន្ទឹមនឹងនេះ ក្រុមហ៊ុនផលិតសម្លៀកបំពាក់បុរសល្បី Sinoer Menswear ក៏បានបង្ហាញបំណងមកសិក្សាផ្ទាល់នៅកម្ពុជា ដើម្បីស្វែងរកឱកាសបង្កើតរោងចក្រ និងនាំចេញផលិតផលទៅទីផ្សារបរទេសកាន់តែច្រើន។

គំនិតផ្តួចផ្តើមនេះត្រូវបានចាត់ទុកថាជាឱកាសថ្មីជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-កម្ពុជា ហើយរំពឹងថានឹងផ្តល់កម្លាំងថ្មីដល់ការកែលម្អឧស្សាហកម្ម និងកំណើននាំចេញកម្ពុជា។

ស្ថានីយយើងចងក្រងរាយការណ៍