រាជធានីភ្នំពេញរបស់កម្ពុជាជាប់ចំណាត់ថ្នាក់ទី១០ក្នុងបញ្ជីទីក្រុងធំល្អបំផុតលើពិភពលោកឆ្នាំ២០២៥ របស់ Condé Nast Traveller ជាមួយគោលដៅទេសចរណ៍ល្បីៗ ហើយក្លាយជាទីក្រុងមួយដែលអ្នកធ្វើដំណើរពិភពលោកមើលឃើញថាមានភាពទាក់ទាញ និងសក្តានុពល។
ពានរង្វាន់ជម្រើសអ្នកអាន ដែលមានអ្នកអានជាង៧៥ម៉ឺននាក់ទូទាំងពិភពលោកចូលរួមបោះឆ្នោត បានរៀបចំដល់លើកទី៣៨ ហើយត្រូវបានចាត់ទុកថាជាពានរង្វាន់ទេសចរណ៍មានឥទ្ធិពលខ្លាំងមួយ។ ប្រភេទរង្វាន់រួមមានទីក្រុង សណ្ឋាគារ ក្រុមហ៊ុនអាកាសចរណ៍ កោះ និងនាវាទេសចរណ៍។ ឆ្នាំនេះភ្នំពេញបានចូលកំពូល១០ជាលើកដំបូង ដែលបង្ហាញថាវប្បធម៌ និងភាពទាក់ទាញទេសចរណ៍ពិសេសរបស់ខ្លួនកំពុងទទួលការចាប់អារម្មណ៍ពីពិភពលោក។
ទស្សនាវដ្តីបានពិពណ៌នាថា មិនថាភ្ញៀវពិសាតែពេលរសៀលបែបអង់គ្លេសនៅសណ្ឋាគារ Raffles ធ្វើដំណើរកម្សាន្តតាមទន្លេមេគង្គពេលយប់ ឬភ្លក្សនំបញ្ចុកខ្មែរតាមដងផ្លូវ ភ្នំពេញសុទ្ធតែអាចឱ្យពួកគេមានអារម្មណ៍ជ្រាលជ្រៅចំពោះសម្រស់ និងវប្បធម៌កម្ពុជា។
ទស្សនាវដ្តីក៏បានលើកឡើងពីទីតាំងសំខាន់ៗរបស់ភ្នំពេញ រួមមានព្រះបរមរាជវាំង និងព្រះវិហារព្រះកែវមរកតដ៏ភ្លឺចែងចាំង ផ្សារទួលទំពូងដ៏មមាញឹក ព្រមទាំងមជ្ឈមណ្ឌលប្រល័យពូជសាសន៍ជើងឯក និងសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដែលមានតម្លៃអប់រំប្រវត្តិសាស្ត្រ។ ទស្សនាវដ្តីបានពិពណ៌នាថា ទីតាំងទាំងនេះជាសាក្សីប្រវត្តិសាស្ត្រដ៏គួរឱ្យគោរព ដែលរំលឹកពីការលំបាករបស់កម្ពុជា និងការរីកចម្រើននាពេលបច្ចុប្បន្ន។
Condé Nast Traveller បង្កើតឡើងក្នុងឆ្នាំ១៩៨៧ ហើយត្រូវបានពិពណ៌នាថា ជាប្រព័ន្ធផ្សព្វផ្សាយមានអំណាចមួយក្នុងវិស័យទេសចរណ៍ប្រណីត។ ទស្សនាវដ្តីនេះប្រតិបត្តិការនៅទីផ្សារអន្តរជាតិ៧ និងទៅដល់អ្នកធ្វើដំណើររាប់លាននាក់ តាមប្រព័ន្ធឌីជីថល សៀវភៅបោះពុម្ព វីដេអូ និងបណ្តាញសង្គម។
ការចូលបញ្ជីរបស់ភ្នំពេញមិនត្រឹមបង្ហាញពីវឌ្ឍនភាពផ្នែកវប្បធម៌ អាហារ និងបទពិសោធន៍ភ្ញៀវទេ ប៉ុន្តែក៏ជាជំហានថ្មីនៃទេសចរណ៍កម្ពុជាលើឆាកអន្តរជាតិផងដែរ។
ស្ថានីយនេះរាយការណ៍សរុប។
