នាយប់ថ្ងៃទី១៧ ខែតុលា ប៉ូលិសភ្នំពេញសហការជាមួយស្ថាប័នផ្សេងៗធ្វើប្រតិបត្តិការនៅខណ្ឌចំការមន ដោយឡោមព័ទ្ធ និងឆែកឆេរអគារ LH RESIDENCE ឃាត់ខ្លួនជនបរទេសសង្ស័យពាក់ព័ន្ធឆបោកអនឡាញ១៧នាក់ និងរឹបអូសឧបករណ៍ជាច្រើន។
ប្រតិបត្តិការមានការសម្របសម្រួលផ្លូវច្បាប់ពីព្រះរាជអាជ្ញារងអមសាលាដំបូងរាជធានីភ្នំពេញ និងអនុវត្តដោយគណៈបញ្ជាការឯកភាពខណ្ឌ។ នៅអគារលេខ១៣ ផ្លូវលេខ៩ សង្កាត់ទន្លេបាសាក់ ប៉ូលិសរកឃើញបន្ទប់មួយចំនួនត្រូវបានកែជាកន្លែងឆបោក។ សមត្ថកិច្ចឃាត់ខ្លួនជនជាតិវៀតណាម១៤នាក់ ក្នុងនោះស្ត្រី៣នាក់ និងបុរសឥណ្ឌូណេស៊ី៣នាក់ ព្រមទាំងរឹបអូសកុំព្យូទ័ររួមអេក្រង់១០៩គ្រឿង អេក្រង់មួយ និងទូរស័ព្ទ១០៣គ្រឿង។
ការស៊ើបអង្កេតបឋមបង្ហាញថា ទីតាំងនេះជាមូលដ្ឋានឆបោកវិនិយោគ ឆបោកអនឡាញ និងឆបោកស្នេហា ដោយជនសង្ស័យប្រើបណ្តាញអនឡាញលួងលោមជនរងគ្រោះនៅបរទេសឱ្យផ្ញើប្រាក់។
ជនសង្ស័យ១៧នាក់ និងភស្តុតាងត្រូវបានប្រគល់ទៅប៉ូលិសភ្នំពេញ ដើម្បីសាកសួរ និងចាត់ការបន្ត។ ប៉ូលិសថា ប្រតិបត្តិការនេះជាផ្នែកនៃយុទ្ធនាការជាតិប្រឆាំងឧក្រិដ្ឋកម្មអនឡាញ ហើយអ្នកចូលរួម ឬជួយសកម្មភាពឆបោកនឹងប្រឈមការចាត់ការតាមច្បាប់យ៉ាងតឹងរ៉ឹង។
ស្ថានីយយើងស្រង់និងចងក្រងព័ត៌មាន
..
