នៅថ្ងៃទី២០ ខែតុលា នាយករដ្ឋមន្ត្រី សម្តេច ហ៊ុន ម៉ាណែត បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការអាកាសយានដ្ឋានអន្តរជាតិតេជោ ដោយសង្កត់ធ្ងន់លើការពង្រឹងប្រព័ន្ធសន្តិសុខអាកាសចរណ៍ជាតិ ដើម្បីការពារការគំរាមកំហែងពីភេរវកម្ម និងឧក្រិដ្ឋកម្មឆ្លងដែន ធានាសុវត្ថិភាពអាកាសចរណ៍ស៊ីវិល ស្ថិរភាពសង្គម និងរូបភាពប្រទេស។ សម្តេចថា អាកាសយានដ្ឋានមិនត្រឹមតែជាច្រកភ្ជាប់ពិភពលោកទេ ប៉ុន្តែក៏ជានិមិត្តរូបសន្តិសុខជាតិ និងទំនុកចិត្តអន្តរជាតិផងដែរ។
សម្តេចបានណែនាំឱ្យរដ្ឋលេខាធិការដ្ឋានអាកាសចរណ៍ស៊ីវិល និងក្រសួងមហាផ្ទៃសហការយ៉ាងជិតស្និទ្ធ ពង្រឹងការគ្រប់គ្រងសន្តិសុខអាកាសយានដ្ឋាន និងច្រកចេញចូលប្រទេស អនុវត្តស្តង់ដារសន្តិសុខអាកាសចរណ៍អន្តរជាតិយ៉ាងតឹងរ៉ឹង និងធានាសុវត្ថិភាពមនុស្ស ទំនិញ និងជើងហោះហើរ។ សម្តេចក៏ថា ក្រសួងមហាផ្ទៃជាស្ថាប័នស្នូលសន្តិសុខជាតិ ត្រូវតាមដានស្ថានការណ៍សន្តិសុខអន្តរជាតិ និងទប់ស្កាត់ភេរវកម្ម ការរត់ពន្ធ ឧក្រិដ្ឋកម្មឆ្លងដែន និងអន្តោប្រវេសន៍ខុសច្បាប់។
នាយករដ្ឋមន្ត្រីថា មន្ត្រីអន្តោប្រវេសន៍ និងត្រួតពិនិត្យសន្តិសុខត្រូវការពារច្រកទ្វារប្រទេស ព្រមទាំងបង្ហាញភាពបើកចំហ និងអរិយធម៌កម្ពុជាតាមសេវាមានស្តង់ដារខ្ពស់។ សម្តេចណែនាំឱ្យមន្ត្រីអន្តោប្រវេសន៍គោរពក្រមសីលធម៌ បំពេញភារកិច្ចតាមច្បាប់ និងប្រព្រឹត្តចំពោះអ្នកដំណើរចូលប្រទេសដោយវិជ្ជាជីវៈ និងរួសរាយ ដោយយកចិត្តទុកដាក់ទាំងសន្តិសុខ និងគុណភាពសេវា។
សម្តេចក៏បានណែនាំក្រសួងទេសចរណ៍ និងស្ថាប័នពាក់ព័ន្ធឱ្យផ្សព្វផ្សាយរូបភាព «កម្ពុជាមានសុវត្ថិភាព រួសរាយរាក់ទាក់ និងគួរឱ្យទុកចិត្ត» ទូទាំងពិភពលោក ដើម្បីឱ្យភ្ញៀវអន្តរជាតិធ្វើដំណើរដោយទំនុកចិត្ត និងទទួលអារម្មណ៍ពីភាពកក់ក្តៅ និងសណ្តាប់ធ្នាប់របស់កម្ពុជា។
ស្ថានីយយើងស្រង់និងចងក្រងព័ត៌មាន
