នៅថ្ងៃទី៣១ ខែតុលា នគរបាលរាជធានីភ្នំពេញបានសហការជាមួយអង្គភាពជាច្រើន ឆែកឆេរទីតាំងសង្ស័យឆបោកតាមទូរគមនាគមន៍មួយនៅផ្លូវលេខ២៥៥ ខណ្ឌទួលគោក និងចាប់ខ្លួនមនុស្ស១១១នាក់ដែលត្រូវបានសង្ស័យថាពាក់ព័ន្ធ។
អ្នកត្រូវចាប់ខ្លួនរួមមានជនជាតិឥណ្ឌូណេស៊ី១០៦នាក់ ក្នុងនោះស្ត្រី៣៦នាក់ និងបុរសជនជាតិកម្ពុជា៥នាក់។ នគរបាលក៏បានដកហូតវត្ថុតាងជាច្រើន រួមទាំងរថយន្ត Hyundai ពីរគ្រឿង ពណ៌សមួយ និងពណ៌ខ្មៅមួយ។
ជនសង្ស័យទាំងអស់ និងវត្ថុតាងត្រូវបានប្រគល់ឱ្យអង្គភាពពាក់ព័ន្ធនៃស្នងការដ្ឋាននគរបាលរាជធានីភ្នំពេញ ដើម្បីស៊ើបអង្កេតបន្តតាមច្បាប់។
នគរបាលបានឱ្យដឹងថា ប្រតិបត្តិការនេះជាផ្នែកនៃយុទ្ធនាការថ្នាក់ជាតិលុបបំបាត់ការឆបោកតាមទូរគមនាគមន៍ ហើយនឹងបន្តអនុវត្តច្បាប់តឹងរ៉ឹង ដោយគ្មានការអត់ឱនចំពោះបទល្មើសពាក់ព័ន្ធការឆបោក។
អត្ថបទសង្ខេបរៀបរៀង
