នារសៀលថ្ងៃទី៥ ខែធ្នូ ប្រមុខរដ្ឋស្តីទីកម្ពុជា សម្តេច ហ៊ុន សែន បានអញ្ជើញមកឆ្នេរខេត្តព្រះសីហនុ ដើម្បីលំហែកាយ និងហែលទឹកសមុទ្រ ដោយមានអភិបាលខេត្តព្រះសីហនុ លោក ម៉ាង ស៊ីណេត អមដំណើរ។ រូបថតថ្មីៗជាច្រើនរបស់សម្តេចត្រូវបានបង្ហោះជាបន្តបន្ទាប់លើគណនីបណ្ដាញសង្គមផ្លូវការរបស់សម្តេច និងទទួលការចាប់អារម្មណ៍។
ក្នុងសារបង្ហោះ សម្តេចបានបញ្ជាក់ថា មិនបានមកទីនេះជាង២ឆ្នាំហើយ។ ទោះទេសភាពនៅទីនេះមិនប្រែប្រួលច្រើនក៏ដោយ តួនាទីរបស់សម្តេចបានប្រែប្រួលយ៉ាងធំ ពីនាយករដ្ឋមន្ត្រី មកជាប្រធានព្រឹទ្ធសភា និងប្រធានឧត្តមក្រុមប្រឹក្សាផ្ទាល់ព្រះមហាក្សត្រ ហើយឥឡូវទទួលភារកិច្ចជាប្រមុខរដ្ឋស្តីទីផង។ សម្តេចបានសរសេរថា ការត្រឡប់មកឆ្នេរលើកនេះ គឺជាការសម្រាកខ្លីក្នុងតួនាទីថ្មី ព្រមទាំងបង្ហាញស្មារតីទទួលខុសត្រូវក្នុងការបន្តរ៉ាប់រងកិច្ចការជាតិ។
រាយការណ៍សរុបដោយស្ថានីយនេះ
